【曾智華專欄】高章印度情慾片

由美國到香港再到全球，本周最多人討論的兩套大片，當然為《奧本海默》及《Barbie芭比》，前一套極品之作，小弟上周瞓身推薦，並預期能於下屆奧斯卡大放異彩，「十拿七穩」（即十個獎項攞硬七個，其他三個則邊緣）。
　　
專欄刊出兩日後，不少老友來短信：「喂，碌Sir，為乜唔寫埋《芭比》呀，美國收贏《奧本》喎！」
　　
唉⋯⋯真係難於啟齒。可能係我冇文化，可能係我欣賞力差，可能係我不懂美國人口味⋯⋯總之，入場睇《芭比》，十五分鐘已經瞓着！醒醒瞓瞓四次之後，終於決定離院，剛剛是一小時十分。
　　
咁睇電影，點寫「影評」？寫咗都「呃稿費」啦。唔好意思，請大家「另睇高明」可也。
　　
返到屋企，條氣唔順，又有時間，又想睇電影，點搞？易啦，一於撳到Netflix，睇睇7月有乜新片上架可也。
　　
咦⋯⋯有套幾吸引喎，印度片，名《愛慾四重奏2》（《Last Stories II》），乜印度會有情慾片嘅咩？邊個做？尺度如何？小弟大為好奇，立即先睇介紹！
　　
原來此片大有來頭，第一集2018年推出，立即轟動一時，並一舉摘下艾美獎。劇本意念來自2013年，同是膾炙人口的《孟買之音》（《Bombay Talkies》）。
　　
兩集《愛慾》皆分別由四位導演執導，每人拍一個故事，以愛情、色慾，以及各種男女性關係貫穿，意識相當具突破性，也大膽。不過，基於印度電檢尺度，並冇徹底裸露鏡頭，全部適可而止，留下大量想像空間畀觀眾。
　　
一部戲分四個故事的好處，為四個導演（R．巴爾奇、康柯納．森．沙爾瑪、蘇卓．枸許、阿米特．拉文德納特．夏瑪）皆唔衰得，同時擺上擂台比併也。
　　
睇《愛慾四重奏2》，完全冇睇《芭比》般的睡意，一百三十二分鐘飛快過去，因為屬相當高章作品也。