【曾智華專欄】態度決定高度

上周到書展做分享講座，公眾問答時，有人舉手：「碌Sir，打工仔點可以成功？」
　　
我半秒都不用猶豫，立即引用當天《星島日報》體育版一段新聞，英國球壇名人林柏特公開讚英國國腳美臣蒙特：「球星，態度決定高度！美臣天賦出眾外，最難得是非常勤奮，場內場外都端正有禮，是位很容易合作的球員！」
　　
職場其實是個整體相當公平的競爭場地，大致上結果是優勝劣敗。
　　
我的看法：「其實打工很容易成功！因為只要你樣樣平均比對手做多少少，已經贏晒！例如勤力多少少、唔計較少少、禮貌好少少、願蝕底少少、上進多少少、公關好少少、修養高少少，如此，你已肯定彈離對手，上司錫晒，最驚你唔撈，因呢類人在職場瀕臨絕種，走咗好難請得返，公司之寶也。」
　　
講出來，簡單到震。但就小弟職場幾十年所見，能做到上述「多少少」的打工仔，十個都冇兩個。故此，任何公司都只能有一個坐到最高位。
　　
現場個個聽到眼定定，於是我繼續講：「其實相對來講，打工很容易失敗！因為只要你事事平均比對手差少少，咁就『掂』㗎啦！例如勤力差少少、計較多少少、禮貌冇少少、專業弱少少、上進欠少少、公關衰少少、修養缺少少⋯⋯如此，你已肯定在公司沉底，若要裁員，必定死先，就咁簡單！」
　　
當年小弟管年輕人電台，個個下屬都想紅想升，「目標一致」。但套用上述現象，十個想升者，只得兩個真正發奮，專業又有紀律地尋求進步。其他呢，正是乜都差少少，到種瓜得瓜時，就認為得到「豆」純因自己唔識擦鞋、上司有眼無珠、同事篤背脊⋯…
　　
總之我冇錯，全部別人的錯！

---------------------------------------------

>>>立即瀏覽【移民百答】欄目：新移民抵埗攻略，老華僑也未必知道的事，移民、工作、居住、食玩買、交通、報稅、銀行、福利、生育、教育。

>>>即讀【新移民專欄】：新移民第一身經驗，與你分享當下年輕移民生活日常大小事，即讀「新移民專欄」。