獨家丨鍾卓穎Ash感激ViuTV冇放棄對Nathan有建議 人妻傳偷食MC被海嘯式圍插死過翻生

2021年參加《全民造星IV》入行的鍾卓穎（Ash），最近在ViuTV黃金時段頻頻曝光，包括孖住師兄193主持英國探靈節目《撞鬼自駕遊》。提到Ash自然聯想到張天賦（MC），曾是人妻的她一出道便跟MC傳緋聞，再被前夫阿龍控訴出軌，純情白衣天使速變淫婦，狂收粗口負評的她選擇閉關兩個月，最終福大命大公司冇放棄，雖然負評冇停過，但已學識睇開啲，對於MC，她強調怕再惹誤會，已冇見面，至於同樣負評纏身的《造星V》Nathan（魏念恩），呢位過來人有少少提議。採訪：杜杜 攝影：譚志光 服裝:@yanyanknits

Ash已學識睇開啲，做好眼前工作，望令外界改觀。

 

Ash下個目標想唱歌出單曲，已積極學唱歌裝備自己。

 

Ash已學識睇開啲，做好眼前工作，望令外界改觀。

 

Ash下個目標想唱歌出單曲，已積極學唱歌裝備自己。

 

去年Ash跟公司開會時，主動提出要求拍靈異節目，最終得到拍《撞鬼自駕遊》機會。她不但自小聽《恐怖熱線》，亦是ViuTV《總有一瓣喺左近》鐵粉，更因家人關係，令她自小對超自然現象特別好奇，「可能體質關係，佢哋好多靈異經歷，但我就冇！所以更加好奇，好想接觸吓。」

Ash跟193主持《撞鬼自駕遊》，大讚對方好識照顧人。

 

寸嘴193好識照顧人

首次跟193合作，Ash都擔心寸嘴的他難相處，「大家認知嘅佢係『你知我咩料啦』，會唔會好難相處、溝通，或者好大男人呢？！點知又冇喎！咩都會問我OK唔OK、好關心人，我中途唔舒服，佢都捱義氣幫我頂。」在Ash眼中，193原來非常man，「有啲地方好窄好黑，得返我哋兩個，更加見到佢會照顧人，驚都要做，佢表面上話卸畀我嗰啲佢都肯做，唔會推我出去。」

2021年，任職護士的Ash，參加《造星IV》但60強止步。

 

雖然Ash當年參加《造星IV》60強止步，但因外形和歌藝不俗，被foul後「還我Ash」之聲不絕，但隨即被爆人妻身份，兼被發現跟拍《時候不早》MV認識的張天賦行超市，前夫甚至闖入MC Live留言叫MC對Ash好啲，令她形象插至地殼底。結果她加入ViuTV一年多，直到今年5月跟樊沛珈主持的《撞名撞城遊一番》，才令她首次在黃金時段亮相，她坦認面對觀眾有壓力，但最終明白，「就算幾好嘅人都會有人唔鍾意，做得幾好都會有人唔喜歡。」

Ash首次跟MC拍《時候不早》MV即傳緋聞。

 

Ash跟樊沛珈主持旅遊節目《撞名撞城遊一番》，最開心有機會上台唱歌。

 

感激冇放棄照簽約

出軌事件對Ash打擊極大，現在她已學識睇開啲，「未簽約前，我都有同魯生（魯庭暉）、高層傾過，佢哋都同我講藝人條路唔易行，可以好bumpy，我話『我做醫院，啲EQ應該OK嘅』，我係低估咗，當真係發生時，條路係可以咁樣㗎！嗰時收到啲訊息都係鬧㗎！聽晒一世人聽過嘅粗口！」她覺得最委屈是連《造星IV》的表現也被誤解，「大家覺得我設計咗個人設，覺得嗰個未必係我。」

2021年平安夜，Ash被網民拍到跟MC行超市而傳出緋聞。

 

可能情緒壓抑得太緊要，當時Ash竟然喊唔出，宣洩不到唯有靠閉關來沉澱自己，「困咗喺屋企個幾兩個月，瞓咗好多覺，以前係機不離身，嗰陣個電話放喺好遠，咁對我最健康，知嗰樣嘢會影響心情，就唔好去接觸，好消耗精神同心情，因為唔食飯，屋企人望住我個樣會好擔心。」她又澄清當時仍未跟ViuTV簽約，但公司一直冇放棄她，「大家有個誤解話，『擺明係出事之前簽咗，冇得唔用啦』，但其實我係事後先簽，公司就係話『唔會因為你嘅輿論而放棄你』，呢樣嘢好感動。」

2022年1月MC開IG Live時，Ash前夫阿龍留言叫MC對Ash好啲。

 

Ash前夫認衝動，出Po向MC道歉。

 

強調同MC真係唔熟

除了公司支持，因為家人和朋友的愛令Ash企返起身，「《造星IV》朋友仔send好多message關心我，嗰陣有個罩罩住自己，接收唔到任何資訊，有日《造星IV》Liu 哥（廖雪蕎）捉我去行山，先吸收返新鮮空氣。」問到《造星V》Nathan（魏念恩）同樣因感情問題出事兼退選，她稱沒資格畀意見對方，但建議用沉澱對抗負面情緒，「點樣去沉澱就要自己搵方法，以我嚟講朋友同屋企人嘅愛係最緊要。」

Ash稱無資格畀意見對方，建議用沉澱對抗負面情緒。

 

25歲的Ash早在23歲結婚，因在醫院工作時好多同事都早婚，氛圍令她想組織家庭，所以跟阿龍認識年多便結婚，但相見好同住難，「一齊住先發覺有啲嘢唔夾，先知太遲，我下次拍拖，想同嗰個人認識耐啲，最好有共同朋友，識得佢仲耐過我，話佢係好仔我會信心大啲。」問到跟MC爆緋聞後仲有冇朋友做？她就解釋跟對方其實唔熟，「我哋傾偈真係唔多，有互follow大家ig，但係冇約出嚟食飯，唔好令人誤會。」

Ash有過失婚經驗，下次再結婚一定會更加審慎睇清對象。

 

《星島頭條》新網站有更多精彩內容：http://www.stheadline.com/

---------------------------------------------

>>>立即瀏覽【移民百答】欄目：新移民抵埗攻略，老華僑也未必知道的事，移民、工作、居住、食玩買、交通、報稅、銀行、福利、生育、教育。

>>>即讀【新移民專欄】：新移民第一身經驗，與你分享當下年輕移民生活日常大小事，即讀「新移民專欄」。