【曾智華專欄】燒鵝價錢練出乜味？

上周體育及傳媒界多面手，也是本報馬經版的台柱「皮蛋黃」黃興桂，在社交平台上載一張「三老」早餐照片，我轉載到老友組別（真係老的朋友），嘩，立時引起一陣懷舊熱潮，人人爭住回憶與三老的關係。
　　
邊三老呢？除黃興桂（79歲）外，就是有「神童偉」之稱的黃文偉（80歲），當年靚仔迷死人，如今仍屬靚佬一名，以及擅於百步穿楊的籃球名將黃國揚（86歲）。
　　
小弟群組內有香樹輝（極資深傳媒人），佢著名Photographic Memory，可將「三老」一切巨細無遺講出，全部今天中年以下者聞所未聞。
　　
最勁為「神童偉」當年一介波牛身分，竟娶得電影界巨星白茵為妻，震動影球兩壇！
　　
懷舊完畢，講講「皮蛋黃」，佢有甚多金句，其中之一為——蔗渣價錢燒鵝味道。
　　
呢個形容詞各界別都可以用得上，因各界別都有「物超所值」及「物非所值」的人物。
　　
簡單如練馬界，馬會剛剛公布上季全港練馬師的每月平均練馬費用。嘩，真係有個「庶渣價錢練出燒鵝味道」㗎！
　　
香港上季有二十二位練馬師，原來成績排第二位的呂健威，練馬費用竟排第二十一，抵到出汁！平均每匹每月收費56,029元。
　　
咁邊個「燒鵝價錢練出蔗渣味道」呢？正是上季練馬師榜包尾大幡、只有九場W的苗禮德，佢在收費排名榜上，竟高踞第五位，平均每匹馬「夠膽」收月費64,579元！
　　
老友，若你是馬主，你會點抉擇？
　　
當然紛紛拒絕食蔗渣，如此，佢怎可唔執包袱？

---------------------------------------------

>>>立即瀏覽【移民百答】欄目：新移民抵埗攻略，老華僑也未必知道的事，移民、工作、居住、食玩買、交通、報稅、銀行、福利、生育、教育。

>>>即讀【新移民專欄】：新移民第一身經驗，與你分享當下年輕移民生活日常大小事，即讀「新移民專欄」。