【曾智華專欄】轉風？自噏？

周一早上夾著大疊報章到茶記食早餐，未坐低已聽到班的士大哥開《城市論壇》，講到好興奮咁款。
　　
我離遠𥄫到佢哋指住《星島日報》猛講。睇睇頭條係乜先⋯⋯哦⋯⋯大圍「圍方」爆棚，人潮逼到港鐵站，區外市民專程「血拼」。
　　
有乜咁巴閉呀？「新廁所」效應啫。論商場，大部分當旺港鐵站上蓋都有啦。頭一兩星期人頭湧湧，唔代表乜嘅，分分鐘「新廁所」效應過去後，班區外消費者又會走返去又一城、圓方、樂富、荷里活、德福⋯⋯甚至過海去太古城、時代、金鐘太古、置地⋯⋯等商場呢！
　　
不過，再聽真啲，咦⋯⋯唔係喎，佢哋並非講商場，係講一位政治人物，「西環契仔」謝偉俊噃，究竟有乜大新聞？火速揭開《星島日報》先。
　　
原來有個專訪，大半版報道。唔⋯⋯睇嚟應該係受上周劉慧卿個訪問引發的。因當日老謝在Emily節目中爆出：「政府執行上太左，有啲過咗位！」
　　
今屆立法會，記者想搵認真批評政府的議員難過乜，故餐餐都係狄志遠，以及新紮的江玉歡，但兩人對政治議題仍相當避忌。
　　
這個與以前的立法會，反差太太太大了。
　　
難得突然有個謝偉俊肯講，我係記者都捉住佢「斬多幾両」啦。佢老哥又幾鬼幽默，開宗明義唔太Buy連「軟對抗」都唔准，但引用例子相當過癮：「現時太多行為被歸入『軟對抗』，其實從根本去控制市民思想並不可行，必須尊重大家的自由意願！好比情侶夫婦，你點可以要求對方日日講『我愛你』咁肉麻㗎，我和白姐姐之間都冇咗呢種要求啦！其實，互相關心，底線是絕不『偷食』，咁就夠喇！」
　　
老謝言論，的士大哥十分啱聽，畀咗幾個Like佢才一哄而散。

---------------------------------------------

>>>立即瀏覽【移民百答】欄目：新移民抵埗攻略，老華僑也未必知道的事，移民、工作、居住、食玩買、交通、報稅、銀行、福利、生育、教育。

>>>即讀【新移民專欄】：新移民第一身經驗，與你分享當下年輕移民生活日常大小事，即讀「新移民專欄」。