【曾智華專欄】傳媒老是佛慈善夜

傳媒乃小弟終身志業，過去五十多年，在業內本識盡無數同聲同氣同抱負之輩，不過，香港變，人的價值觀亦會變，部分難再維持昔日的感情。
　　
幸而仍有不少能堅守道德底線，可以有共同語言，故能定期相聚。十幾年前吳錫輝吹BB召集，我當然跟上，再加埋張文新、何定鈞、潘啟迪、關偉、陳早標、曾展章、陳家耀、盧炳松、羅燦、陳景祥及鄭明仁，再加施永遠（已在天堂），共十四大漢，組成「快樂傳媒老是佛」。起初意念是因大家快六十了，為維繫長遠感情，最佳用美食做媒介，定時聚首，大吃大喝大講「舊時乜乜物物」。
　　
每次聚會，你爆我又爆，內容涉及政官商及傳媒界秘聞，精采百出，火花四濺。
　　
可惜大部分內容太震撼，不便曝光，只能圍內「欣賞」。發展到今天，一半老是佛已七十開外，大半經已全退休，聚會時更少牽掛，講得更放。
　　
去年開始，小弟忽發奇想——哈，我哋講得咁過癮，為乜唔一年一度「侵埋」其他人玩及聽呢？肯定大受歡迎！再進一步構思，將聚會變為善事，參加者每位須捐一百元給大會指定慈善機構！
　　
我乃「行動派」，一講即做，由訂場地開始組織，過程得到眾老是佛支持，三個月即籌備完成。
　　
一如所料，「快樂傳媒老是佛慈善夜」一開即爆，全部參加者開心到彈起，尤其資深業內人士，從未有機會走埋一齊玩、一齊笑、一齊爆昔日的瘀嘢也。
　　
一次之後，N人問幾時第二次？好！唔畀佢停，一於年尾來第二集！
　　
場地、日子、內容全部已在小弟腦內，一旦安排妥當，立即公布。
　　
今次應可撥部分位置畀公眾參與，感受快樂氣氛，留意本欄可也！

---------------------------------------------

>>>立即瀏覽【移民百答】欄目：新移民抵埗攻略，老華僑也未必知道的事，移民、工作、居住、食玩買、交通、報稅、銀行、福利、生育、教育。

>>>即讀【新移民專欄】：新移民第一身經驗，與你分享當下年輕移民生活日常大小事，即讀「新移民專欄」。