【曾智華專欄】騎練收入的天與地

香港馬季唞暑，唔怕，立即有「美沙酮」賽事推出，明天直播新加坡打吡賽馬日，頂住癮先。
　　
馬迷乃一個非常易「服侍」的群體，總之有得玩就人人乖乖踴躍捐輸，一於齊齊忍到9月10日香港馬季再開鑼！
　　
新加坡賽事水準甚低，連當地人都唔熱衷，故雖有一百八十年歷史，也在冇乜反對聲中，決定明年10月5日收檔。
　　
其實一個地方賽馬事業是否蓬勃，與其管理層的功力、參與的人數及投入的金錢，絕對有關。點解馬會總裁應家柏值四、五千萬元年薪？唔好齋妒忌，問吓圈中人，自會有公正評論。
　　
另外，香港人賽馬熱情也真非比尋常，單單煞科日已有二十億六千五百萬元投注。若以每人平均投注一千元計算，即可能有二百萬人參與（當然內有不少神秘大戶）。
　　
其實香港的現役馬不多，只有一千二百五十匹，佔全球賽駒零點七左右。不過，實在超犀利，我哋擁有三匹世界馬王級數駿馬——「金鎗六十」、「浪漫勇士」及「金鑽貴人」。
　　
點解有咁多勁馬？因非常多會員爭相做馬主，個個不惜腰間錢，瞓身競逐每季十七億三千萬元的總獎金。
　　
賽馬業要持續強勁，馬之外，騎練水準也是決定性的一環。香港的騎師及練馬師淘汰性極強，季季都有人「被Out」。不過，毋須擔心兵源．我哋有天文數字獎金，吸引全球頂級騎練。
　　
舉例，練馬師可分百分之九點二勝出獎金，於是前領的蔡約翰、呂健威、羅富全、告東尼及沈集成，全部一季過千萬元！
　　
騎師更勁，跑出頭馬可分一成獎金，意即潘頓最少有二千萬元！
　　
當然有人快樂，總有人愁，騎練榜尾的，計一計，哎，都幾噹揼㗎。

---------------------------------------------

>>>立即瀏覽【移民百答】欄目：新移民抵埗攻略，老華僑也未必知道的事，移民、工作、居住、食玩買、交通、報稅、銀行、福利、生育、教育。

>>>即讀【新移民專欄】：新移民第一身經驗，與你分享當下年輕移民生活日常大小事，即讀「新移民專欄」。