【曾智華專欄】大股東巡視業務

邊個係大股東？為弟細佬我！邊家公司？中電！巡視乜嘢業務？正是其最新搞作。
　　
小弟的投資素來公開。其中退休組合大柱躉，乃長揸不放的中電。
　　
不少只懂見升講升、見跌講跌，又驚青慌死蝕底的投機散戶，不會揸中電，因為——悶，冇得炒。
　　
更加不會似我咁，以「娶老婆」心態，識於微時，揸個天長地久，任何環境都不離不棄。
　　
近兩年聽見傳媒上對中電的評論，皆非常短視，只識講：「嘩，由接近九十蚊跌落五十幾蚊呀！」但永不懂講：「嘩，由二十幾蚊升上九十幾蚊，仲要年年收四、五厘息，有升又有息呀，發達！」
　　
短視的散戶若在去年10月底沽了中電，就真係喊都無謂，因如今比當時價位已升咗兩成幾。
　　
中電多年來只做錯一件事，投資澳洲，但現正部署甩掉佢。之後會點？繼續扎實地長期享有政府規定的八厘利潤，試問邊幾隻股有如此優越基礎？
　　
小弟投資乃為退休安穩，由三十幾蚊開始揸中電，超級滿意佢派息及管理，回報已三倍。所以，從不會與無知者辯論應否買中電，免得嘥口水。
　　
揸咁多中電，當然關心佢業務，包括對社會貢獻！所以，當知道「中電鐘樓文化館」落成，當然飛身第一時間參觀。
　　
位於亞皆老街的中電鐘樓，從來是公司鮮明標誌，1940年落成，足足有八十三年歷史了。大家可知，這段長長的日子，香港起了多少驚人的變化？
　　
文化館由香港電力的發展放射，連繫到本城幾個重要的發展階段。
　　
建議大家三代同堂一齊參觀，因館內的珍品、短片及互動展品，可以將幾代人放入同一條時光隧道，感覺非常夢幻，肯定有助增長親情！