【曾智華專欄】上錯賊船點辦？

個人社交平台不少留言都是問投資的，但問者十之七八皆屬「無知」，投資而「無知」，唔死幾難矣。

大量打工仔，死捱爛捱才儲到兩、三百萬元。另外，不少人買餸為慳三幾蚊，也會身水身汗四圍格價，仲有啲打風落雨、酷熱天氣也不搭的士，而走去輪巴士，就為少付三幾十蚊。

但以上的「精明人士」，一去到「投資領域」，立即變白癡。個個連家公司做乜業務、有乜前景、管理層如何、負債比率如何⋯⋯乜都唔知，只見到網上「有人話」呢隻「當炒」，就瞓三幾十萬元，甚至一兩百萬元落去。

咁冇腦，你叫我點幫你呢？

但人的弱點，就是又貪又懶（學習），再多兩樣就是好色及孤獨，四味加埋，簡直是任何騙徒的肥大水魚，唔劏你就真係「冇天理」（騙子心態！）嘞。

無知有好多種，但若果你又唔睇新聞，又唔日日夜夜留意行騙最新手法，咁中招乃遲早的事，十種電騙，你起碼中幾種！

昨日有位長者粉絲喊咁口留言問：「我早前在網上見到乜叔及物Sir指有隻股當炒，號碼係24XX，我雖然唔知隻嘢做乜，但乜叔及物Sir咁大名氣，咪跟囉。初初買一手，好快賺咗五成，再買又再中，於是將銀行定期百五萬蚊放晒落去，點知⋯⋯竟然一日跌一半，揸多啲又跌一半。幾蚊入，如今變四毫子，碌Sir，我應該點搞呀？」

一聽佢話網上的乜叔及物Sir，已知假嘢啦。兩個我都識，點會推介呢類「老千股」啊！其實以前班騙徒也曾冒認超人及薯片叔叔引水魚，不過佢哋太猛料，冇乜人信，於是改搵返班財經分析員做「招牌」行騙。十個無知友中一個已好和味！

我點答？簡單：「上錯賊船，速速跳船！」

---------------------------------------------

>>>立即瀏覽【移民百答】欄目：新移民抵埗攻略，老華僑也未必知道的事，移民、工作、居住、食玩買、交通、報稅、銀行、福利、生育、教育。

>>>即讀【新移民專欄】：新移民第一身經驗，與你分享當下年輕移民生活日常大小事，即讀「新移民專欄」。