【曾智華專欄】出唔出書，講唔講嘢

3月開始，在任何場合碰到生張熟李（是否很老套的形容詞？），都會問：「碌Sir，今年書展有冇新書出？有冇講座？」

「唔好意思，今年冇新書出版，也不會舉行講座，等下年睇睇有冇啦！」

突然5月收到出版社邀請：「曾先生，今年你兩位老友盧炳松及羅國森有新書出，分別名《識做》及《理想、退休》，貿發局安排佢哋開講座，可否幫幫忙，7月21日傍晚六點幫手做主持？唔阻你好多時間，個半小時！」

嘻嘻，本來想問問對方：「究竟有幾多出場費先？」講真，書展並非慈善活動，我似乎冇乜理由義務演出喎。不過，仍是吞回問題，因自己在書展開過幾次講座，也做過幾次嘉賓，回報都是「白果」！今次當然也如是，好，一於義務幫老友！

應承後，就要開始做功課嘞，究竟如何帶動氣氛，引發嘉賓暢所欲言及鼓勵參加者發問呢？全部都不能夠爆肚，必須一一預先計劃。

盧炳松乃資深新聞人，上世紀70年代著名記者，後改投公關界，闖出一片彩虹，分別被重金禮聘出任可口可樂、迪士尼集團及領展基金高層，負責機構企業傳訊工作。

一個華人闖上美國集團頂層，絕對不易之外，要打破同事間隔膜，肯定更要有一套工夫，BC（盧的外號）到時在講座會詳述，並清楚指出「識做」與「擦鞋」的分別。此外，還會爆爆三十年前代表可口可樂與中國官僚交手的火辣經驗。

至於羅國森，乃財務策劃專家，專替人安排退休理財大計，以達致安心安全活至人生終點。

兩位分享內容，必定充實精采。舉行地點是S421號房，周五晚六點。想參加，自己到貿發局網頁「卜」位啦！