【曾智華專欄】超級抵睇，難言驚喜

電影的宣傳片是兩刃刀，可以吸引你入場，也可令你入場之後，覺得反高潮，超高難度的動作片，例如《殺神》系列及《狂野時速》系列一類大片，通常上畫前一個月已在戲院、電視及網上大力狂谷，將最精華驚險片段剪出，日播夜播。
　　
係呀，可以製造萬眾期待效果。不過，真正睇時，大家可能冇晒癮，因最正的片段已睇過晒。
　　
今次以雷霆萬鈞姿態，鋪天蓋地宣傳的《職業特工隊：死亡清算上集》，也絕對如是。
　　
個多月前開始，任何電影畫頭必有此片精華片段，吸引到飛起，但見「靚佬湯」幕幕搵命博，狂飛車不止，更「飛人」，由千米高空往下衝（用替身啩？）！打鬥設計也難度絕高，睇見都有啲鼻哥窿冇肉之感（佢強調絕少用CG，大部分堅持嚟真，唔用替身！）。
　　
咁鬼吸引，小弟當然第一時間仆入場，睇睇原汁原味的又如何？
　　
第一感覺，太長，兩小時四十三分，根本應該剪去三分一，尤其搵戲做的多餘文場；第二，劇本套路毫無新鮮感，二流編劇都可創作出來，故全片只能以大量難度高動作補救；第三，所有最精采的片段已在宣傳片中睇過晒，人人睇咗N次，已再無驚喜。
　　
你問我此片抵唔抵睇？抵到出汁！畀一百幾十元（我是七十元長者票），有咁高水平的天文數字投資電影你欣賞，仲想點？
　　
但有冇意外驚喜？零！基於銀幕上畫面熟口熟面，故銀幕下的我可以出出入入去洗手及覆電郵。每次離開再返座位，完全冇「斷片」，一切發展在意料中，一於繼續睇。
　　
湯告魯斯就似幾年前的成龍，每見佢堅持死搏時，真想問——幾時考慮收手呢？

---------------------------------------------

>>>立即瀏覽【移民百答】欄目：新移民抵埗攻略，老華僑也未必知道的事，移民、工作、居住、食玩買、交通、報稅、銀行、福利、生育、教育。

>>>即讀【新移民專欄】：新移民第一身經驗，與你分享當下年輕移民生活日常大小事，即讀「新移民專欄」。