【曾智華專欄】串串貢，句句中

童年時，最喜歡拉爺爺衫尾入戲院，睇關德興做主角的《黃飛鴻》系列。目的有三：一、涼冷氣；二、睇黃飛鴻警惡懲奸，將衰人石堅打到一仆一碌，維護正義，大快人心。
　　
仲有就係第三，睇黃飛鴻窒到西瓜刨扮演的牙擦蘇飛起，真真娛樂性豐富。
　　
窒人，其實好冇禮貌。不過，若是見到有料者出言窒到應，又幾過鬼癮，大快人心。
　　
周初在一個金融經濟論壇中，就正正見到素來「串串貢」的行政會議成員及前金管局總裁任志剛，毫不畀面，串到財經事務及庫務局局長許正宇飛起。
　　
一開波，「銀髮任」已擺明睇唔起「許弟弟」。因老任經已74歲，佢入政府時（1971年），小許仍未出世（1976年出生），以任志剛咁心高氣傲性格，叫我同你平起平坐討論財經金融？唔玩你就唔係「金融沙皇」啦。
　　
結果，一場類似黃飛鴻窒牙擦蘇的論壇，就在眾目睽睽下展開嘞。小弟有眾多老友在場親睹，真係笑爆嘴，尤其老任窒小許：「我乜乜物物時，你都未出世啦！」
　　
不過，老任串還串，真係句句中。尤其不屑政府未完全搞清楚啲虛擬嘢係乜，就力推發展虛擬金融資產政策。
　　
任志剛擺明有備而來，整個氹畀許正宇踩，個氹正是一條問題：「話我知，虛擬資產點樣可以支持到經濟？」
　　
咁環境，小許當然畀老任氣場壓扁，答到一口泡。於是，自然被食住上教訓。
　　
講真，我絕對同意老任睇法㗎。佢話：「所謂虛擬資產，連支持其價值的真實資產都未見，資產負債表又冇，如何支持實體經濟？我一定唔會買虛擬資產，因為唔知佢背後係乜？咁都買，不如去賭場買好啦！」
　　
真係串串貢，句句中！