【曾智華專欄】無敵是最寂寞

當今香港馬壇一哥潘頓，一如所有馬迷預料，終在上周日創造歷史紀錄，今季已贏到173W，打破莫雷拉2016年/2017年所創下的紀錄，成為史上單季最多W的騎師。

你服唔服？我就唔多服嘞！

冇人會否認潘頓的騎功是現今香港最高，事實，根本難有人可以接近。

不過，佢今季創造歷史，絕非甚麼偉大成就！本欄讀者必知，小弟對莫雷拉離港前大段時間的策騎作風相當不滿，曾揶揄為「拉縮」。但公道點講，若有佢在，潘頓絕冇機會打破歷史紀錄！當年拉叔是面對潘頓如此犀利對手下，取得170W的，難度與潘頓今季所面對的完全不同！

今天馬圈，客觀形勢是潘頓「隻手遮天」，對，佢騎功最高，但更重要，幾乎所有最頂級的好馬（除咗「金鎗六十」），全被佢「霸」晒（當然也有不少馬是「求」佢騎的）。比起其他騎師，根本是活在另一境界，壟斷的馬也是另一水平。

在這情況下破紀錄，怎說也難令人信服，擺明屈機也。

遠的唔講，單講上周日的馬，你知我知，佢贏的四匹之中，「嘉應獎昇」、「勤德威力」及「驕陽明駒」，套用張福元術語，擺明大超班，可以「行返嚟贏」，講真，邊個騎都W啦，使鬼佢咩。

發展到今天，香港賽馬最冇癮為畀潘頓玩晒，相信任何高手都唔會開心得去邊，因為無敵是最寂寞，無相近水平高手在陣，佢騎功又豈能再進步？再加咁多好馬騎，單手都贏啦！

今晚快活谷，潘頓威完，應該唞吓，畀其他人搵啖食嘞。我會𥄫實上周日「夢遊馬場」，三隻跑包尾的田雞！希望佢生生性性，為何良贏「包裝大獎」。另一隻何廐馬「謙謙君子」也是邊線，誠心希望老何能畢業！