【曾智華專欄】睇又得，唔睇冇損失

這篇稿本來是一周前刊登的，不過為免「倒米」，決定先擺櫃桶七日，再交編輯。
　　
講乜？正是睇完電影《別叫我"賭神"》之後的感覺。
　　
可能太多珠玉在前，故此對周潤發真的充滿期望，因佢不輕易接拍電影，加上多年才磨一劍，當然抱著滿懷希望入場。
　　
結果只是見到一個在不斷重複自己的「發仔」（昔日的稱呼），演技、表情、對白，彷彿就是以前十數部作品的翻炒大拼盤。
　　
唯一令人歎服的，為片內的周潤發真的好似食咗「防腐劑」（坊間形容歲月無痕一族），Keep得狀態極佳，怎看也不似六十幾。
　　
唔知點解，由劇情到攝影到場景化妝，《別叫我"賭神"》都冇乜「香港味」，卻又明明全部演員皆是香港人，講廣東話，更是時裝片。
　　
就算全片在澳門拍攝，也不應如此的，有冇人可以拆解當中玄機呢？
　　
導演潘耀明雖是金像獎攝影師，拍出《無間道》及《竊聽風雲》等無數叫好叫座高質素商業片，但今次轉任導演，說故事的技法似乎仍大有「進步空間」。
　　
其實《別叫我"賭神"》的主要演員，全部屬有料到的演技派，包括袁詠儀、方中信、白只、廖啟智，尤其後兩者，在此片只扮演在發仔身邊的跟班，神神化化，毫無發揮機會，浪費大好人才。此片乃智叔其中一部遺作，搞成「咁樣」，不免令人欷歔。
　　
幸而也不是個個無從發揮的。扮演周潤發自閉兒子的柯煒林，演出也算令人眼前一亮。只31歲，未來若遇到好劇本，應該不僅於提名大獎（曾經四次），而應能真真正正獲獎！
　　
入場前，早聞此片在內地也不大收得。看完之後，不覺得意外，到底只屬「睇又得，唔睇冇損失」一類電影而已。