【曾智華專欄】荷里活老男人

這兩年個個月都有同輩離世或跌倒斷骨，故此，不停有人在身邊講：「一定要認老！」
　　
認老，不代表思想老化，而是接受身體老化，所以，以前能做的，今天不能做，正常，無謂逞英雄，因時不我與了！
　　
剛剛睇完《奪寶奇兵：命運輪盤》，正正有強烈感覺——都成80歲垂垂老矣，仍要扮演Indiana Jones，跳上跳落騎馬四圍衝，夏里遜福究竟為乜要拍此片？
　　
佢唔辛苦，觀眾都辛苦啊！
　　
對，一睇就知全片皆滿布電腦科技及替身，並非夏里遜本人，但是，仍有不少近鏡要搵命博咁款，有乜需要呢？
　　
近十年小弟已再冇興趣睇成龍電影，原因？唉，仲打乜鬼呀。最怕貨比貨，佢以前靈活過馬騮，套套經典之作仍不時在串流平台睇到。
　　
Indiana Jones一樣，首集是1981年，四十二年前。我只20幾歲，如今快七字頭了。
　　
夏里遜福呢，當年風華正茂，如日方中萬人迷，身手亦敏捷，只是30幾。老友，時光真係會飛逝㗎。
　　
荷里活今天仍有不少演得又賣得的老男人演員，魅力不減，但多只演自己同齡角色，故有滿滿的吸引力及說服力。
　　
例如93歲的奇連伊士活、快80歲的羅拔迪尼路，以及剛剛逝世的艾倫雅堅（89歲）。尤其後者，在2018年至2021年，與同是老男人的米高德格拉斯（78歲）拍檔的電視劇《荷里活教父》，簡直笑爆嘴。兩人最煞食，演回一對真真正正的老男人知己，由心理到生理皆「原汁原味」，若你是60歲以上，好難不先而會心微笑，繼而哈哈大笑。
　　
相比夏里遜福在《命運輪盤》中的力不從心，無法不歎句——為乜搵啲咁嘢拍？