【曾智華專欄】布文1蚊雞四重彩

資深馬迷投注，各有自己竅門，有的睇賠率，有的睇騎師，有的睇馬房，有的睇往績，有的睇血統，有的睇「燈神」，有的聽秘料⋯⋯不一而足，各人的堅持必有其因（通常贏過大錢，以後堅信不疑）。

我的一位老友「馬精P」，也有獨門投注大法，揚言經常「大獲全勝」。上周五晚飯，佢拉我講：「碌Sir，反正街外錢。嗱，你明天照我方法落注，若贏的話就公開啦，小弟今季盤滿缽滿秘笈啊！」

係乜？正是場場用布文做四重彩複式膽，1蚊雞買全餐。最重錘都係一拖十三，即本錢6864元！點解用布文而不用其他騎師？

「數據顯示，布文的馬入到前四名的，有五成五，好誇張！即用佢做膽，複式四重彩，有五成五機會收錢。嗱，你一於明天試吓啦！」

翌日香港回歸賽馬日，打開排位，布文騎九場，場場十四隻。若跟足「馬精P」指示，注額是61776元。6萬幾元？對我這類細細注、大大聲一族，太過天文數字。不過，唔買都計吓！

果然布文騎九隻，水準穩定，有五隻入四重彩。五場加埋派彩470362元，1蚊雞投注收47036元（有冇一成回扣呢？）。

賽事一完，即收到「馬精P」來電：「今日輸少少，唔緊要，但你已知『布文投注大法』威力。其實只要有場走隻九十九倍入前四，就爆到七彩㗎，繼續努力！」

賽馬只是我的遊戲，每個賽馬日重錘六萬幾元？絕非我杯茶。

今晚又跑喇，一於捧布文！羅富全請佢騎三隻，必有王者興！「為您鍾情」初跑谷草，換來賠率。「駿寶」上次輸外檔，今場見真章！另加一隻姚廄準繩重磅馬「運高八斗」，布文專誠試閘，非常認真！以上三匹，W三串七，P三串四，睇住大師傅表演啦！祝「福有油雞」！