【曾智華專欄】裙拉褲甩倒瀉籮蟹

邊個群拉褲甩？邊個倒瀉籮蟹？正是一眾出版商及印刷商，因為全行都在衝死線！
　　
死線就在7月18日，因為《第33屆香港書展》7月19日開波，若7月18日仍未有齊所有新出版的書上架，想蝕死乎？
　　
不過，印刷商就似裝修判頭，十之九九不會在承諾的日期完工，點都要拖拖拖，拖到跌落懸崖前才交貨，次次搞到班客心臟病發，今年當然唔例外。
　　
我點知？因為小弟幾位老友出書，想先睹為快，若有料的話，幫佢哋打鑼打鼓，搞旺個市嘛。
　　
點知個個同樣苦口苦面答：「唉⋯⋯追到幾乎反面，但出版商根本唔敢話幾時有書，只敢講，7月19日在會場必定有！」
　　
香港書展，經歷2019年社會運動及之後的疫情，去年復辦時，個個本來唔睇好，因大量書種隨著社會形勢而消失。點知全部跌眼鏡！竟有八十五萬人入場！
　　
今年又如何？冇理由突然變差啩？
　　
究竟今年會流行乜書種呢？肯定社會政治書，冇出版商博，以免浪費子彈。起而代之，三種一定推：一、香港有二百幾萬初老及老咗的市民，故此，一切關乎點做智慧長者的書，肯定大賣。去年老人科權威梁萬福醫生的《好好準備變老》大賣特賣，踏入今年走勢仍勁，最近更鯉魚翻身，再彈返上「健康、生活」類書的第一位！二、一切有關面對移民生活的書，這個毋須言明，心照。三、通關後，出外旅遊熱潮勁度反彈，介紹深度自由行的書大為渴市。四、科技書籍，配合大潮流。
　　
至於以往曾經大賣的財經書，今年謝謝哋，因市道唔掂。
　　
事實，出慣呢類書的財經評論員，自己都捱得好辛苦，點教人投資呢？

---------------------------------------------

>>>立即瀏覽【移民百答】欄目：新移民抵埗攻略，老華僑也未必知道的事，移民、工作、居住、食玩買、交通、報稅、銀行、福利、生育、教育。

>>>即讀【新移民專欄】：新移民第一身經驗，與你分享當下年輕移民生活日常大小事，即讀「新移民專欄」。