【曾智華專欄】你的毒藥，我的蜜糖

童年時已接觸以下兩句：一、你的毒藥，我的蜜糖；二、你的地獄，我的天堂。
　　
老師不用多解釋，因小學生也能意會，然後開竅，推而廣之，就會知道每一件事都可以從多個角度去感受。此外，不同人對不同事的喜好，絕不會一致，視乎個性、興趣、利益與立場。
　　
正因咁，當我聽到近日馬經界老友呻到樹葉都落，話7月開始，賽馬進入「地獄賽程」，辛苦到嘔，馬會絕不應作出如此安排，我幾大唔講出心中話，只一律以微笑回應。
　　
事實，佢哋係咪好辛苦？係！係咪踢晒腳、頭都大？係！馬評人是否根本冇時間逐場研究，唯有符符碌碌交行貨貼士？可能係！
　
不過，老友，每個行業都有其遊戲規則，你加入時，理應清楚。再不，既然是一份工作，一份責任，呻又要做，「享受」又要做，若日日夜夜咿咿哦哦，實在令周圍人有點煩厭，反應必是：「咁鬼難，你就咪鬼做啦！」
　　
睇睇英超，聖誕前例必開快車，兩日一場等閒事，做球員的早知，正是食得鹹魚抵得渴。
　　
賽馬圈又如何？你話香港九日跑四次賽馬辛鬼苦？哎吔吔，你千祈咪畀英國佬聽到，因為佢哋剛結束的「皇家雅士谷賽期」，五日跑五次，同一個馬場，同一班馬評人，同一班工作人員，更重要，同一班騎師，兼且不少場次成三十匹馬！
　　
你香港九日跑四次，你好意思話係「地獄賽程」？真係笑死英國佬未天光！
　　
馬經界老友知否，呢四日馬迷係幾開心的呢？跑呀跑呀跑，好快樂㗎！是否正是你的地獄、我的天堂最佳寫照呢？
　　
今日研究第六場，十二隻中，告、蔡兩廄共五隻，隨時一齊縮！買「你知我拼」及「八心八箭」對碰W！

---------------------------------------------

>>>立即瀏覽【移民百答】欄目：新移民抵埗攻略，老華僑也未必知道的事，移民、工作、居住、食玩買、交通、報稅、銀行、福利、生育、教育。

>>>即讀【新移民專欄】：新移民第一身經驗，與你分享當下年輕移民生活日常大小事，即讀「新移民專欄」。