【曾智華專欄】「堅又威」贏得未？

哈哈，唔知點解，過去幾個月不停有老友問：「喂，碌Sir，『堅又威』贏得未呀？」
　　
2月19日之前，更有老友窒：「喂，你班聖Joe仔千祈咪收埋食呀，聽講隻馬好勁揪，可以一出即勝，父系『精明火箭』Smart Missile喎！」
　　
結果你知我知，首次登場，「堅又威」近都唔近吓，輸近六個馬位。其實嗰場隻馬仲生，蘇兆輝轉入直路擺明「棄胡」，故輸咁遠。
　　
4月30日再出，配馬昆，四檔，但上場輸得太遠，冇乜人信會變身，結果十二倍跑入Q，明顯有勢，但仍輸兩個半馬位。
　　
此時，肯定大量馬迷認定第三場會到位，所以說雖排十四檔，配何澤堯，竟熱到六點八倍，完全唔合邏輯，我當然冇買。
　　
賽前馬迷睇見沙圈「堅又威」的空群而出捧場陣容，一定以為冇得輸嘞（包括零零亨？）。
　　
「堅又威賽馬團體」由多位聖若瑟舊生合組，個個有家人，兼馬匹出賽時，又會請埋舊日校長、老師一齊打氣，當然更會有百計舊同學乘機聚會，於是咪搞到咁墟冚囉，其實完全同是否贏得冇關㗎。
　　
所以，各位今日若又見到沙圈成群打著綠白呔阿哥阿叔阿伯，歡天喜地拖男帶女扶老攜幼，咪又以為「堅又威」必定起筷呀，未必㗎！
　　
事實隻馬只得3歲，若畀我揸Fit，一定會同姚本輝商量，是否應畀佢提早唞暑。因四個月跑三場，對BB馬來講，可能有少少谷多咗。
　　
不過，無論如何，今日一定又極之惹飛，賠率與機會未必成正比。若太熱，就要睇值博率喇！
　　
我又如何？「母校馬」有感情，一於捧50元W，唔使補P嘞。點解？今次「軟硬鞭」潘頓騎，十檔加程二百米，佢未摸過。
　　
此君作風冇興趣跑第二，入直路若發覺W唔到，就立即收工！

---------------------------------------------

>>>立即瀏覽【移民百答】欄目：新移民抵埗攻略，老華僑也未必知道的事，移民、工作、居住、食玩買、交通、報稅、銀行、福利、生育、教育。

>>>即讀【新移民專欄】：新移民第一身經驗，與你分享當下年輕移民生活日常大小事，即讀「新移民專欄」。