【曾智華專欄】同一卡士不同味道

今日標題，小弟想講乜？講國際四、五星級酒店是也。味道係乜？正是房內的「味道」。
　　
寫此稿時，正坐在台北中山區南京東路的「JR東日本大飯店」，窗明几淨，裝修舒服簡潔，所有員工由大門口服務員到大堂、到接待處，再到執房的，皆提供優質笑容及服務。香港？已愈來愈少見到呢種由心而出的服務精神。
　　
服務，包括「軟」和「硬」。「軟」的，就是真真正正與客人交流的服務，講態度，講精神，講文化，講價值觀。
　　
「硬」的，則是一切設計、裝修及設備。
　　
上月到佛山兩天，也是住在國際級酒店（通常會交由一品牌管理），硬件一流，超乎及格水平，不過⋯⋯一入房就皺眉！
　　
點解？因傳來淡淡的茅台味及煙味。喂，聲明要禁煙房噃，豈能如此？再者，此酒店甚新，不足兩年，實在不合乎常理。
　　
茅台味及煙味何處來？因「日子有功」，不停地嗦，於是窗簾、布沙發、枕頭及被鋪皆有，總之，凡有針織纖維的都「被喝酒」、「被吸煙」，是避無可避！
　　
台灣同一卡士酒店呢？同樣是禁煙房，近年小弟住過N家不同集團管理的，一律無此問題，究竟點解？
　　
現今仍有不少內地高級酒店，聘請香港人管理，肥W為多年老友，好奇之下拉佢一問。不問猶自可，一問真係成肚苦水吐出：「碌Sir，我當然知啦！唉⋯⋯你估我想嘅咩？但住得起內地五星酒店者，皆屬豪客。內地豪客的長大過程，感染的文化及習慣，與外地大有不同，仍有不少是財大氣粗的。關埋房門大喝大噴（煙），我哋知都冇法禁止。事實，當中不少是「有權人士」！佢哋使得起錢，提供大量生意，點可以一犯規即趕客吖，呢度中國呀！」

---------------------------------------------

>>>立即瀏覽【移民百答】欄目：新移民抵埗攻略，老華僑也未必知道的事，移民、工作、居住、食玩買、交通、報稅、銀行、福利、生育、教育。

>>>即讀【新移民專欄】：新移民第一身經驗，與你分享當下年輕移民生活日常大小事，即讀「新移民專欄」。