【曾智華專欄】你的最愛是誰？

踏入季尾，大賽跑得八八九九，全部高潮已過，咁仲有乜盛事呢？有！正是選最受歡迎騎師及最受歡迎馬匹。全面開放畀公眾投票，直至7月7日截止，一人一票，一定公平（啩？）！
　　
先講騎師，今季冠軍，冇咗「拉叔」之後，完全冇得爭，潘頓大超班（其實亦因好馬都畀佢霸晒），遠遠拋離第二位的何澤堯。不過，你知我知，潘頓以「軟硬鞭」見稱，龍或蟲任佢開，玩死馬迷，故此，如小弟一類，選最受歡迎——絕對唔投佢，因唔服！
　　
至於第二位的何澤堯，騎功未算頂級，表現也不算最穩定，若冇咗「金鎗六十」，也好難有光芒之感，呢票我也投唔落手。
　　
至於經常入到第四的「田雞」田泰安，也只是一班尾貨色，經常在一日之內「一係唔去，一係狂去」，水準太飄忽。
　　
睇來睇去，小弟一票決定投畀42歲的老將布文。呢位四屆雪梨冠軍騎師兼澳洲賽馬名人堂獲選者（2019年），願意長期留港，實乃馬迷的最大福氣。
　　
布文跑咗半季，已穩坐三哥之位，功力絕對貨真價實，忽龍忽蟲表現甚少，馬迷有目共睹！此外，老布與各大馬房合作也相當犀利，能全部出賽馬匹皆入前四名的包括：文家良、方嘉柏、呂健威、沈集成、告東尼、姚本輝、徐雨石、賀賢、葉楚航、蔡約翰、鄭俊偉及羅富全。難怪個個練馬師錫晒佢，爭住合作！
　　
至於最受歡迎馬匹，冇得爭，一定係「金鎗六十」，今季出五次中至長途，四W一Q，難度遠比只懂跑短途的「金鑽貴人」高得多，人人都寫個服字！
　　
今晚快活谷之戰，報名罕見踴躍，只有三班大長途較疏落。決定「包裝旋風」、「高瞻遠矚」及「勁駒」三匹二重彩複式互穿！

---------------------------------------------

>>>立即瀏覽【移民百答】欄目：新移民抵埗攻略，老華僑也未必知道的事，移民、工作、居住、食玩買、交通、報稅、銀行、福利、生育、教育。

>>>即讀【新移民專欄】：新移民第一身經驗，與你分享當下年輕移民生活日常大小事，即讀「新移民專欄」。