【曾智華專欄】寫極唔「斷氣」

早前小弟在本欄介紹一位唱極唔「斷氣」的歌手，名Solo，70幾歲，逢周五在灣仔一家社企「New Life生生餐廳」六點開唱，直踩落十點，完全唔使休息，冇Break，更神奇，不用去洗手間！簡直「奇技大觀」。
　　
此君另一神級功力，整晚完全不用睇譜、睇歌詞，就可唱出上世紀由50年代開始的經典名曲，國語又得，廣東話又得，英文更是耍家。
　　
文章刊出後，N咁多人訂位去「參觀」呢位全世界獨一無二奇技歌手，搞到餐廳主理人Tina大樂，因為幫到好多弱勢社群人士有工開也。
　　
我形容人「唔斷氣」，但也畀人同樣形容。
　　
社交場合中，被人問得最多，當然為近來買乜好？（點解香港人日日都掛住投資的呢？唔投資會瞓唔着？）
　　
另外有不少人又問：「碌Sir，點解你日日咁多嘢寫，可以寫足幾十年仍未『斷氣』的呢？究竟有乜條件先能做到此境界？」
　　
其實不同人有不同天分，若順住去做，多數會有成效。
　　
寫稿，有人攞起支筆覺得成擔重，嘔一篇文章，慘過便秘者如廁（唔好意思，比較核突，但這形容最貼切）。
　　
我呢？因天生對所有事物好奇，又對乜都有看法（冇話啱唔啱），又有發表欲，更甚唔知面懵為何物，故可以執起筆就寫，間中快如閃電。
　　
點解面懵為主要條件之一？心理學有授，老一輩長者亦不時講：第一，事事沉默，畀人一種智者感覺，尤其不少男性會如此扮嘢；第二，正是「唔出聲冇人話你啞」！講少啲，寫少啲，唔發表意見，最安全，明哲保身也。
　　
但是世事兩面睇，若個個唔出聲扮智者，唔講嘢求安全，咁社會仲點會「五光十色」及「百花齊放」呀？好啦，你唔寫？我一於寫到「唔斷氣」囉。