【曾智華專欄】全力打氣上上上

馬季進入倒數階段，有兩個可能冇牌練馬師，何良最危險，能上岸機會日比日微。
　　
另一個鄭俊偉，就似在跑馬拉松末段，體力已消耗得七七八八，隨時未到終點就仆低。幸而看台之上滿是打氣呼聲，大家齊齊集氣——上上上，一定要衝線！
　　
至今只差一場四班或以上冠軍，我睇就算最終未足額，只要寫出一封令馬會管理層信服的請求留任信，應該可以玩多季。
　　
因佢已有十八W，又永不放棄，單單同情分已經滿滿。
　　
小弟為表支持，近兩次賽事開始投注佢旗下馬。雖則上次標題的「滿歡笑」叮叮，但竟然爆出隻近十三倍的「威力飛彈」，乜都補返晒。
　　
講到這一W，我有少少嘢想講。馬主曾向東事後開開心心向傳媒表示：「早前刻意讓此馬轉投鄭廄，是希望幫練者爭分上岸！」
　　
這種講法，好似是「明醒」鄭俊偉，刻意畀隻贏得的馬來幫佢達標。
　　
係真唔係真？難講！小弟只想指出，這隻5歲澳洲馬到港後，分別養在呂健威及黎昭昇馬房，出賽九次，全部不入三甲，大部分戰績相當離譜，六次跑十名至包尾。
　　
這樣的一隻馬，你話用來「幫人」？有少少勉強喎！其實馬主應該大方一點表示：「感謝鄭俊偉及其團隊，『威力飛彈』轉入鄭廄後，有脫胎換骨表現，出賽五次，一W一Q一第四，戰績遠遠比在上兩手馬房更好，足見練者的功力！」
　　
喂，咁講係咪大方得體好多呢？
　　
明天又跑黃昏馬，一於繼續替鄭俊偉打氣——上上上，上岸！
　　
今次我集中研究三級賽「精英碟」，全季「多巴先生」只一W，正是重磅配布文，應該再起筷了，二重彩複式膽拖3、5、7、8四隻啦！

---------------------------------------------

>>>立即瀏覽【移民百答】欄目：新移民抵埗攻略，老華僑也未必知道的事，移民、工作、居住、食玩買、交通、報稅、銀行、福利、生育、教育。

>>>即讀【新移民專欄】：新移民第一身經驗，與你分享當下年輕移民生活日常大小事，即讀「新移民專欄」。