【曾智華專欄】最後的擁抱

根本毋須禁忌，反之，絕對應該要做。係乜？正是當你步入某個年齡（對我來說是70歲），就應構思好自己的人生退場方式，託付後代或遺囑執行人，某日拜拜時就做。
　　
近兩年，頻頻，真係頻頻㗎，不停有認識者（未必能稱朋友）上天堂，個個方式皆不同。
　　
有的希望「大鑼大鼓」，大搞追悼儀式。
　　
有的臨走幾年似失蹤般，你只知佢仍在世，但拒絕見任何人（除咗至親），直至走咗，你才會從某些渠道得知。
　　
較特別的是藝術大師黃永玉，一生瀟灑，連走也走得瀟灑過人。早早立下法律指示——乜都唔做，亦乜都唔准人做，包括留下骨灰！
　　
黃大師6月13日離去，之後子女發出公告謂尊重父親意願——不舉行任何告別或追悼儀式。
　　
而佢的法律顧問陳漢，也為確保人人得知，更作出聲明：根據遺囑指示，黃永玉要求離去後，遺體立即進行火化，任何人，包括子女，不得以任何理由取回骨灰；而骨灰全部只准用作肥田料，直接回歸大自然。另外，任何人不得辦任何紀念活動，家人更不准支持或參加其他人搞的紀念活動！　
　　
奇唔奇？我都係第一次見，但也想照抄！
　　
講到告別，最近又參加咗另一位藝術家的「作品告別大會」。佢聲明此乃最後一次展覽，若係好朋友，必須出席。
　　
去到大大個會場，有樂隊，有小食，藝術家畢生引以為傲的作品全部展出。
　　
80幾歲的身軀明顯已弱不禁風，但仍勉強支撐企起，與來賓逐一深情擁抱。大家見佢穿著全套紅卜卜的禮服，已知是有所暗示。
　　
總之，一切盡在不言中。這種派對，總比離開後在靈堂默哀親暱得多。

---------------------------------------------

>>>立即瀏覽【移民百答】欄目：新移民抵埗攻略，老華僑也未必知道的事，移民、工作、居住、食玩買、交通、報稅、銀行、福利、生育、教育。

>>>即讀【新移民專欄】：新移民第一身經驗，與你分享當下年輕移民生活日常大小事，即讀「新移民專欄」。