【曾智華專欄】ABC勿溝落一二三

你搶別人人才，別人也搶你人才！昨日講到有外地富豪，為搞個大到驚人、足以同時開二千席中菜的會議展覽中心，而當地根本冇人可以承擔管理廚房的大任，於是來香港挖角，一出手就令目標人物無法抗拒——六倍薪金加豪華住宿及座駕，另頭等來回機票、班底任請⋯⋯

外邊不停挖香港飲食業人才，其實香港自己業內也互挖。廚師之外，管理人才更吃香。

小弟與輝哥三十多年前認識一位業內女強人，名郭雅詩（Alice），打得捱得管得，故大受當年鴻星集團老闆器重。郭小姐天生豪氣，極易與大開大埋的傳媒人做朋友。例如N年前已與廣播界前輩陳任深交，對方不時傳授待人處事及公關伎倆，間接令Alice火速上位。

一上位，自然多人撬，但郭小姐屬義氣仔女，既得老闆提拔，豈可別人用錢挖就跳槽？

直至鴻星集團轉大股東，時機到了，郭雅詩三年後終可向外闖。

今天佢乃一個龐大飲食集團高層，負責管理幾萬方呎大的「星薈館」。

前晚又與輝哥一同敘舊。Alice兩杯到肚，不忘再謝上咗天堂的恩師陳任：「佢真係教我好多嘢，尤其宴請不同業界人士。初出道時，小妹矇查查，以為凡同一界別者就可共坐，點知⋯⋯哎吔吔，原來個個江湖有恩怨，中間冇人話你知邊個與邊個有牙齒印，你唔識做，將ABC溝落一二三，即刻死得，嬲你唔知，話你唔好意思！」

對，宴客，排位大過天！呢項「藝術」非常重要，必須事先摸清邊個同邊個妥/唔妥！「星薈館」內古玩甚多，好此道者，唔食都睇吓！

---------------------------------------------

>>>立即瀏覽【移民百答】欄目：新移民抵埗攻略，老華僑也未必知道的事，移民、工作、居住、食玩買、交通、報稅、銀行、福利、生育、教育。

>>>即讀【新移民專欄】：新移民第一身經驗，與你分享當下年輕移民生活日常大小事，即讀「新移民專欄」。