【曾智華專欄】出手勁重搶人才

有人冇工做，有工冇人做！電視新聞見到內地負責人苦口苦面，話有六百萬年輕人（不少大學畢業生）冇工做，慘情。

相反，睇睇香港，雖未至「雞飛狗走」，但事實係走咗十萬計中堅專業骨幹分子。最弊連昔日人人搶著做的「鐵飯碗」公務員崗位，都大量辭職。這一個連鎖效應，搞到行行業業高中低皆大量空缺，打工一族「從未如此吃香過」。

香港政府揚言搶人才，究竟有幾大成效，未知，但肯定勞工引入方面，絕對冇難度，因出手比內地高出一半，大把人肯來。

不過，你搶人，人亦搶你，其中一行為頂級廚師。香港的中菜廚師從來非常吃香，因可以融會中西烹調法，不少更懂英文，兼且執生快、彈性大，故此外地中式酒樓要撬人，一定到港挖。

真係話口未完，又失一個，勁無奈！日前拉隊到心儀又相熟的菜館晚飯，呢餐兩個月前已囑咐大廚W哥，表演一頓米芝蓮級數出品。

時間到，坐低，正！酒樓落地玻璃望正岸邊兩隻大黃鴨，人人精神為之一震，因個個仍有童心，當然爭相打卡。

開餐前，大廚有點愁眉，拉我講：「碌Sir，煮埋呢餐，唔知幾時再有幸炮製美食你歎啦！」

慘慘慘，點解？原來某一亞洲急速冒起國家的首富，準備在當地搞個會展中心，內有不同級數餐廳及可擺二千圍的超級大禮堂。

於是，四出挖將軍級行政總廚。結果，睇中W哥，因佢廚藝高，有班底，更有管理大集團廚房團隊多年經驗。

首富即係首富，為搶人才，一出手，你估畀幾多？六倍香港人工！

「碌Sir，我仍未夠50歲，明知成功機會只得一半，都冇理由唔試吓卦？」W哥微笑講。

---------------------------------------------

>>>立即瀏覽【移民百答】欄目：新移民抵埗攻略，老華僑也未必知道的事，移民、工作、居住、食玩買、交通、報稅、銀行、福利、生育、教育。

>>>即讀【新移民專欄】：新移民第一身經驗，與你分享當下年輕移民生活日常大小事，即讀「新移民專欄」。