【曾智華專欄】一個「大寶藏」博覽會

N年前長輩有句口頭禪——有麝自然香。
　　
去到上世紀70年代，香港廣告業起飛，有機會認識廣告界名人，佢哋一致認為以上名句——多餘兼Out到爆。任何商品，點可以就咁呆呆坐喺度博有人知？
　　
故此想商品大賣，一要講包裝，二要講市場策略，三要講廣告推廣。如此，商品才會一飛沖天去。
　　
今日有感而發，因剛剛見到一個「大寶藏」博覽會，擺明欠缺全天候滲透式宣傳，最終可能變咗嘥料。咁啦，等小弟免費代推廣啦，因內容的確正，睇唔睇你自己決定嘞。
　　
活動名《國際文化、旅遊與非物質文化遺產展覽會》（似水蛇膥咁長），將於6月30日起，一連三日在亞洲國際博覽館舉行。
　　
睇見內容，我都有少少O嘴，肯定做咗無盡咁多籌備工夫。因展覽雲集的國際文化，簡直就似來自聯合國，包括：中國、捷克、匈牙利、哈薩克、日本、老撾、馬來西亞、巴拿馬、秘魯、菲律賓、卡塔爾、俄羅斯、南非、津巴布韋⋯⋯不少國家更直接派代表到會場，作獨有的國家文化表演，目標是推廣各地旅遊，希望吸引大量遊客遠赴當地，體會具深度的異國風情。
　　
此博覽會另有兩大特點：
　　
一、提供各地的大自然美景，全部以能令人心靈放鬆為基調。遊客每到一處，皆可呼吸最新鮮的空氣，以及看到無盡的綠色，百分百與城市的壓逼感相反。
　　
二、介紹各地文化遺產。文化遺產一般較古舊呆板，幸而如今有了新科技，一結合，就可用3D激光掃描，帶你神遊各地，穿梭於虛幻與真實之間。
　　
這個「大寶藏」博覽會完全免費，講句俗啲，真係唔睇就笨！主辦者，快快大力宣傳啦。