【曾智華專欄】唔會「斷氣」的歌手

很喜歡幫襯社企餐廳，雖然大部分由食物到裝修到服務，皆不會高水準，但每次離開，總有一份祥和感覺，因自己為社會做了點點事。
　　
個人最多去的，是高山劇場由扶康會營運的康姨小廚，地方簡潔，服務到位，出品也不錯，少有高水準社企食肆。
　　
剛剛5月、6月大裝修，咁去邊好呢？
　　
有嘞，經典歌手老友Solo一年前通知：「碌Sir，我凡周五晚在灣仔『New Life生生餐廳』唱，你咁喜歡上世紀50、60、70年代英文歌，快啲嚟，唱晒畀你聽！」
　　
立即訂位，帶埋幾支紅酒，再加幾位長者樂迷操上去。
　　
咦，地方優雅，氣氛設計點點懷舊。只六點半啫，Solo已在大唱特唱The Beatles、Bee Gees、Perry Como、Matt Monro、Platters、Simon & Garfunkel⋯⋯
　　
現場客人多六十至八十歲為主（Solo也七十幾喇老友），肯定是多年的粉絲，時而跟住引吭高歌，時而撲出舞池大跳Cha Cha、Twist、Waltz⋯⋯甚至幾乎絕跡了的Charleston及Shake也有，個個回復十八廿二般的狂熱大跳特跳。
　　
跳舞，小弟絕不擅長，但幾杯紅酒到肚，微醺下看著人人快樂地又唱又跳，真有一種久違了的大同世界感覺。
　　
現今歌手，應該只有Solo能不用睇歌詞、不用睇譜，即能將上世紀50年代開始的半個世紀中英文金曲隨口唱出，誇張啲講，相信全世界只得佢一人可如此，能用純正國語及廣東話演繹所有經曲作品（大家若發覺另有一位能如此的，煩通知）。
　　
更厲害及難以想像的，為不知佢個胃及膀胱用乜造，竟可六點開始到我腳步浮浮十點離開，秒秒都冇離開崗位，不斷地唱！
　　
乜嘢人嚟㗎，可以唱唔「斷氣」嘅？
　　
此店管理人Tina溫文大方，相信這應是做得善事多，醞釀出來的氣質。