【曾智華專欄】鶼鰈情深滋陰阿伯

今時今日，仲有幾多人識寫鶼鰈情深？
　　
其實我都唔識，幸有智能手機，打上「XX」加「情深」兩字，即彈出此形容詞。
　　
寫稿學中文，再重溫這四個字意思：比喻人與人之間的感情，特別是一對夫婦互相深愛對方，融洽相處。鶼（音兼）及鰈（音碟）是很特別的鳥類和魚類，分別是比翼鳥和比目魚。
　　
為何突然想起此詞？喂，好深啫！乃因小弟每朝皆到家居附近公園晨運，絕大部分為熟客，朝朝準時出現。其中有一對近70歲夫婦，實在無法令你不動容。女的明顯中過風，再行唔到，故此，由男的每朝九點用輪椅推到公園，做兩件事：一、丈夫替太太全身按摩，逐個部位，由頭開始直到腳底；二、協助太太用公園裏的基本健身器材，慢慢將四肢運動。
　　
整個過程，肥胖太太皆軟綿綿無力，丈夫卻要花上很大的氣力。
　　
以上情況，我足足目睹兩年。點解今天才寫出來？乃因大家都會衰退，包括「情聖」級的丈夫。睇住佢日日用大量體能將重重的太太連輪椅推上斜路，明顯氣力日比日差，但仍咬咬牙死頂，真擔心終有日連佢自己也倒下，到時⋯⋯真的難以想像。
　　
公園另一邊，又有個滋陰的肥佬伯。昨早一幕，相當過癮。因阿伯行到坐慣的長椅，竟被一無禮大媽用雜物霸晒。
　　
阿伯問：「可否讓讓，畀張凳我坐吓呢？」
　　
大媽藐嘴答：「周圍都係凳，為乜要坐我身邊呀老坑？」
　　
換轉第二個，必扯火。但滋陰阿伯微微嘴：「阿嬸，我老，係福氣，早早兒孫滿堂。哈哈！你呢，咁鬼冇品，唔知有冇機會老噃！陰公！」
　　
圍著的人見到呢幕，內心笑死，結果大媽發爛渣狂罵咗兩聲，敗走而去。