独家丨李婉华评剧惨被煽动人身攻击 直斥王晶行为贱格:唔系朋友
已移居加拿大多年的李婉华于网台节目《豪华博客》批评《一舞倾城》“卖处”养家剧情教坏细路，辣㷫负责制作的王晶，出post大反击耻笑女方“过气四线”及“TVB屎戏之王”。事隔多日，刚回港的婉华表示唔嬲王晶但就划清界线：“佢唔系我朋友，朋友唔会做伤害对方嘅嘢！”更直指被王晶人身攻击，咬住唔放，全因自己好虾，更斥对方发表煽动言论，令人互相攻击，行为好贱，最后更抛下一句：“咁大个人，积吓口德啦。”采访：方骞平 摄影：谭志光
今次隔空开火，哑忍多年的婉华才揭示跟王晶的24年恩怨情仇。1999年，婉华接拍王晶执导的电影《制服诱惑2︰地下法庭》，埋位前一日，晶哥突然要求她剥衫演出遭拒绝，至上映时才发现被裸露，由替身代她剥衫，演艺路上无啦啦有个污点，她强调问心无愧，因为冇拍过，被标签也没办法。突然感怀的她坦言有得再选人生，会好好读书，因为做演员唔容易，8、90年代电影女星好多只系花瓶。
拍王晶戏唔使演技
李婉华坦言唔系王晶提起，都唔会记得当年被裸露事件：“𠮶个年代佢系大导演，我呢啲演员No Say，拍咗咪算囉，但就真系冇兴趣睇返，呢啲情欲戏唔好睇，都提醒返演员将来要面对自己及仔女，要小心拣戏。”讲到被王晶贬为过气“4线”演员，她相当不忿：“我always一线，佢话4线就4线咩？如果我戏屎，拍嘅电视剧就唔会数唔到咁多啦，电视台出身嘅熟能生巧，大部份识演戏。”婉华揶揄说：“反而拍佢啲戏，做戏唔使咁叻，因为有啲演员卖身材，有啲就卖关系。”问到系咪冇朋友做？她即割席：“不嬲系导演跟演员关系，讲唔上系朋友，朋友系唔会伤害对方嘅。”
睇王晶戏唔使用脑
因为少睇港剧，李婉华唔知《一》剧由王晶制作，强调就算知道都以事论事，作为家长要灌输正确道德观念畀子女，竟遭王晶反击，指她“那么有道德就教好你的加拿大女儿，守住处女到40岁。”，婉华笑言：“大人唔需要讲呢啲嘢呀，仲讲埋人哋个女，但如果人哋讲返佢，佢可能会10倍奉还，我谂佢系拣人(开刀)嘅，觉得我几好虾！哈….好多人戥我不值！我唔嬲，只系突显佢系乜人，咁大个人要积吓口德啦，呢班人喺80、90年代都攞尽晒好处，如果我系佢会提携多啲年青人，传承电影。”婉华更斥好勇斗狠嘅人好难有好作品：“用闹人、踩人及做啲煽动言论，令人互相攻击，我觉得好贱同唔理智囉！希望香港人个个都可以开开心心，珍惜返我哋拥有嘅有人及事，点解要互相攻击呢？我哋睇佢啲戏都系想唔用脑寻找娱乐。”
安慰姜涛勿介意肥瘦
提到近年港产片，婉华大赞《正义回廊》，导演何爵天拍得好、麦沛东及杨伟伦演得好，读过演艺学院的婉华，好开心演艺学生得到业界认同；至于贾胜枫执导的《流水落花》、陈小娟的《沦落人》都系好戏。至于新晋演员，婉华力推“教主”卢瀚霆：“我好钟意睇佢同吕爵安CP剧《大叔的爱》，连汁都捞埋，又好花心地钟意埋既乖仔及靓仔嘅姜涛。”对于姜涛个唱海报被恶搞变大肥仔，婉华作出安慰：“唔好理人点讲，钟意你唔会介意你肥定瘦，喺妈妈级角度，见到佢肥仲开心，最重要系健康开心，肯食嘢咪仲好。”婉华又温馨提示教主要多休息。另外，对19岁的囡囡Natalie想入行，婉华叮嘱她要先读好书磨利把刀，只有知识带唔走：“好似猪肉威(刘宋威)系最佳例证，佢戴咗口罩一双电眼令人有幻想，但除罩大家喜唔喜欢就自行判断，要成为被追捧及受欣赏偶像，系唔可以斋摆甫士，必须有才艺及人品。”
《星岛头条》APP经已推出最新版本，请立即更新，浏览更精彩内容：http://www.stheadline.com/
>>>星岛网WhatsApp爆料热线(416)6775679，爆料一经录用，薄酬致意。
>>>立即浏览【移民百答】栏目：新移民抵埗攻略，老华侨也未必知道的事，移民、工作、居住、食玩买、交通、报税、银行、福利、生育、教育。
