【曾智華專欄】你唔做？佢即接！

土瓜灣的老街坊，冇人會唔認識江蘇街七喜麵食小館。此店已有數十年歷史，雖則細細間，但晚晚人流鼎盛，客如流水，經常排隊。

事實，七喜不賣環境及舒適（冇枱布、坐摺凳、逼逼貢，擺明唔該速速食完，快快離席畀下一位），但仍爆到七彩，點解？

簡單，平靚正，老闆嚴先生日日監場，親自下廚，出品由蒸煎燜燉炒小菜到雲吞水餃麵食，再到蝦球花膠粥，全部質素有保證，同一收費，難尋對手，故此，好生意到要擺出街。

結果當然被不停投訴，尤其深夜，不少客人幾支大啤到肚，說話豪情奔放，影響街坊睡眠。

基於太多新舊客，二十年前嚴老闆再在隔籬浙江街租下一鋪，以作「食客分流」。一直冇問題，直至⋯⋯三年前，大件事，兩間鋪開吓又唔准開，生意插水式下跌。

剛剛此時土瓜灣港鐵站落成，即時效果係⋯⋯業主飛擒大咬，約滿即加二萬元！

咁即係賺埋畀佢？於是嚴老闆痛下決定，將浙江街二十年小鋪冚旗，唔做嘞。

昨晚又去七喜老鋪買廣東水餃回家自煮，與老闆閒聊兩句。佢一開口，已狂噴苦水：「碌Sir，個業主真係離晒大譜！過去二十年，我月月準時交租，計計埋埋已過千萬
元！養足佢二十年，約滿竟獅子開大口？唔做咪罷囉！」

這就是香港行資本主義的現實！業主不是善長，法例容許賺到盡，被指無良也懶理。挽住袋水餃行過浙江街攞車，咦⋯⋯七喜唔租一個月啫，個鋪晚上仍燈光火著，但見水電油漆工人全在趕趕趕，新人接手了。
　　
這類鋪永遠雞死雞鳴，因有晒圖則設計及食物牌，免去大量重新搞的麻煩也。
　　
總之，你唔做？佢即接！

---------------------------------------------

>>>立即瀏覽【移民百答】欄目：新移民抵埗攻略，老華僑也未必知道的事，移民、工作、居住、食玩買、交通、報稅、銀行、福利、生育、教育。

>>>即讀【新移民專欄】：新移民第一身經驗，與你分享當下年輕移民生活日常大小事，即讀「新移民專欄」。