【黃庭桄專欄】深宵的門匙聲

誰沒試過年少輕狂？那年頭，只掛住玩樂，放學或放工後，總愛呼朋喚友，節目多多。
　　
這天約豬朋搓麻將，那晚跟狗友唱K到凌晨；如果情竇已開，當然把握機會，見多幾面得幾面，拍拖大過天。問老竇姓乜？早已拋諸腦後，只知有酒今朝醉。
　　
玩啊玩！飲啊飲！錫啊錫！從來都沒有看過腕表到了幾多點，當然也不知道家中有人在等門！有時玩到通宵達旦，成身散晒才回家，倒頭便昏睡。
　　
餐桌上原來早已放了一個暖壺，裏面是清肝潤肺的愛心湯水，可惜媽媽的心意，沒有瞄過一眼，也沒有飲過一口。有時候，媽媽還未睡，會溫柔地問：「不如飲啖湯先瞓啦！」往往換來無情的冷待，「好眼瞓呀！唔飲啦！唔好煩我！」
　　
成長的字典，還未有深深印下「珍惜」兩個字。直到自己為人父母後，才體會到媽媽的苦心。
　　
每當子女說約了朋友去夜街，原來作為父母，是會心掛掛，不時抬頭看牆上的掛鐘，到底會幾點回家呢？女兒會不會被壞人灌醉呢？交往的人，是不是損友呢？心頭總有千百個擔憂的問號，在大廳踱來踱去都總是不放心。
　　
「不如WhatsApp問吓佢會幾點返來？使唔使揸車去接佢？」試問哪個父母會瞓得安樂？總會叫另一半追問子女的下落。
　　
然後入夜後，即使熄了燈，其實根本不敢安睡，直到聽到子女的門匙聲，才放下心頭大石。也許會爬起床，扮屙夜尿，然後溫馨問道：「你飲唔飲啖湯？」
　　
養兒方知父母恩，有些暖意，往往後知後覺，願你，愛不要太遲。

---------------------------------------------

>>>立即瀏覽【移民百答】欄目：新移民抵埗攻略，老華僑也未必知道的事，移民、工作、居住、食玩買、交通、報稅、銀行、福利、生育、教育。

>>>即讀【新移民專欄】：新移民第一身經驗，與你分享當下年輕移民生活日常大小事，即讀「新移民專欄」。