【曾智華專欄】土壤論

一時在天堂，一時在地獄！
　　
我講邊個？正是公認的球王美斯！去年帶領阿根廷國家隊奪得世界盃，在全球掌聲之中登上頂峰，摘下一切光榮。回到阿根廷，當然更被安排以國家英雄級榮譽凱旋。
　　
不過，短短一年後竟然……唉，若以由天堂跌落地獄形容，確有點誇張，但堂堂球王，在法國告別的一戰，竟只能在噓聲中尷尷尬尬地下台，未免存在極大遺憾。
　　
球場上的明星，際遇就是如此。球迷可以捧你上天，也可踩你落地。
　　
事實，無人不知，上一代的球王包括C朗及美斯，最光輝的時代、最Top Form的體能、最旺盛的鬥心全已過去，不能強求。
　　
今天大群三十五歲以上的球壇巨星，內心盤算甚麼？對！正是執尾會，這個包括去年金球獎得主賓施馬！
　　
十多二十年前，歐洲頂級球星執尾會目的地是美國！例如碧咸正是鮮明例子。
　　
如今的，當然是沙特阿拉伯。班油王出手真是驚人，年薪可以由幾億到幾十億港元，聽落係咪癲癲哋？好似係，其實唔係。因佢哋買入巨星，連一切肖像權、專利權、乜權物權加加埋埋，再揸乾揸淨。
　　
不過，有個理論叫「土壤論」。一棵植物在一種土壤上開花結果，發光發熱，但一移到另一種土壤中，可變黯然無光，甚至凋謝枯萎。
　　
因為一個人的成功，尤其幕前人物，其實背後的支援及營造，才是最大靈魂。
　　
舉例，上世紀八十年代亞洲電視天價撬TVB當家藝員過檔，結果，機構文化不同，價值觀不同，老闆視野不同，創作團隊不同⋯⋯種種不同下，冇一個能維持昔日在「無記」的光輝，因「土壤」不同也。C朗、美斯及賓施馬的未來，應該也必一樣。