【蔡思貝專訪】首位「90後」視后實力獲認可 視演員為終身職業

 

【星島頭條專訪】提起蔡思貝（Sisley Choi）這個名字，大家的腦海可能會馬上可能會立刻聯想到港姐亞軍？《踩過界》中的「哨牙癲姐」？或者一些負面新聞？然而，在現實生活中，Sisley 熱愛演戲，性格積極樂觀，並希望將演戲成為終身事業。

Sisley 日前接受《星島頭條》的專訪，看出Sisley的性格與「癲姐」有著許多相似之處，同樣是講義氣、重情義、勇於面對及克服困難的人。她一直堅持演戲夢，默默做好每一齣劇，2020年憑藉《踩過界II》中的醜女「癲姐」一角獲得了「最佳女主角」殊榮，成為首位獲獎的「90後」視后，實力得到認可，成功在觀眾的記憶中烙下了名字。

加拿大成就解鎖

Sisley 剛從英國拍攝完節目《貝遊英倫》返港，其後又馬不停蹄轉場加拿大。她興奮地說：「我好多朋友都係溫哥華，都知道呢度好多好靚嘅大自然風光，同埋天氣好好，海鮮好新鮮，好多嘢食，好多戶外活動。不過今次係為咗見加拿大的粉絲，加上行程緊密，所以都唔預時間玩。我同自己講，今次先唔當旅遊，下次過嚟先係真正嘅加拿大之旅。」

熱愛旅遊的 Sisley 在時隔多年後，終於再次起行拍攝旅遊節目《貝游英倫》，她分享今次去英國單拖出行，「我對上一次係五年前同余德丞拍攝《緬甸奇幻旅程》，之後咁多年都冇拍旅遊節目啦。然後喺一個機緣巧合嘅情況下，無預先 planning，籌備唔夠1日嘅時間，就隻身一個人飛去英國。成件事係好隨意，今次係單人嘅旅遊節目，其實成件事感覺及做法都唔同，因為我冇一個 partner 互動，我係要自己同攝影師策劃。估唔到最後播出街後，迴響好好，大家原來中意睇我去旅行，中意睇我去玩，中意睇我食嘢，我覺得好感恩。」

錯有錯著選港姐

Sisley 在 2013 年參加香港小姐競選，最終獲得亞軍。原來這個決定是錯有錯著，她分享說：「嗰陣時我喺德國讀緊大學，原本想趁暑假返香港報讀演藝學院嘅暑期課程，可惜報唔切，咁啱喺網上睇到香港小姐接受報名，跟住我就諗，咦，咁我咪可以用海外佳麗身分參選，拎張免費機票返香港？最終如意算盤打唔響，原來海外佳麗招募其實一早截止，事後先知自己填嘅係本地佳麗表格。」

Sisley 憶述，「當時媽咪收到面試通知時是星期五，面試時間是星期日，當時我馬上要決定返唔返香港，我就同自己講，唔好諗咁多啦，最後就返咗香港參選。」

目前以工作為先

雖然 Sisley 目前以工作為先，但她直言身邊朋友相繼結婚生仔，無疑為自己帶來壓力。有時她會想「我個歲數係咪係時候諗諗生 B 呢？但冇對象又點生？即係要雪卵？其實我好鍾意小朋友，我細細個已經諗過領養小朋友，世界咁多孤兒，如果我有能力領養到小朋友，我都覺得好開心嘅！」

即使未有計劃建立自己的家庭，Sisley 亦結交了一班堪比家人的閨蜜好姊妹，與賴慰玲、陳瀅、陳嘉寶、何雁詩及吳嘉熙組成「SIXTERS」。提起好姊妹時，她不禁表現出興奮之情：「其實我 suggest 過好多次嘅，我哋一班好姊妹一齊去旅行，好似之前『胡說八道會』咁同遊澳洲。大家肯定會好開心，但係 SIXTERS 有啲唔係 TVB，所以就有呢個尷尬位，未必成事。」

「有讚有彈好平常」

港姐出身的演員一般會予人花瓶的形象，Sisley 也不例外，在事業初期面對觀眾對其演技的質疑，加上排山倒海的八卦新聞，令她一度陷入低谷，對此她會淡然看待，「其實有讚有彈好平常，至於傳聞，大多只係人云亦云，我可以做嘅係盡力做好演員嘅本分，用心去演繹不同嘅角色，希望大家集中關注我嘅作品，我真係好鍾意演戲，已經視「演員」為終身職業。

Sisley 因為趙正妹變得樂觀及充滿正能量，「我自己嗰段時間偏偏就係拍緊趙正妹，呈現出自卑、冇自信、好可憐的一個女仔，其實相反我覺得我同趙正妹連接一齊，我係一個中意堅持到底嘅人，唔會輕易放棄。趙正妹最後成為一個大律師，我都係不斷努力的蔡思貝。」

 

「趙正妹性格好似我」

回顧 Sisley 過去10 年的演藝生涯，她曾飾演許多不同的角色，最為加拿大觀眾熟悉的

當然是《踩過界》趙正妹（癲姐）一角。她表示：「其實每一個角色我都好鍾意，佢哋都帶畀我唔同嘅體驗，至於「癲姐」？仍同我好似，都係講義氣、重情義、勇於面對及克服困難的人。「癲姐」由自卑、欠缺自信、身世可憐，到最後成為一位大律師，都同我產生共鳴，其實我都係一個不斷努力，能夠為目標堅持嘅人。

話雖如此，Sisley承認第一天飾演「癲姐」的時候的確有所顧忌，甚至不敢張開口露出哨牙。

「林志華監製見狀鼓勵我，叫我去擁抱趙正妹嘅醜，就係咁我成功解鎖新技能，接受咗自己醜嘅一面，最後更感受到趙正妹的內在美，嗰陣時我係好 enjoy 成個拍攝過程。」

對於Sisley個人最喜愛演繹過的角色，她直言每一個角色都喜歡，因為給她有好多深刻的體驗，「例如《踩過界》，我好中意成個故事，由妹癲姐到一個成功嘅大律師，呢個成長階段其實在不知不覺間植入我的生活，即係真實生活中的我同時亦跟住成長。好似《大帥哥》可以與張衛健合作，我喺佢身上學到好多嘢，所以其實每一個角色我都好中意，因為每一個角色都給我唔同嘅體驗。」

 

Back to normal

近日坊間屢傳 Sisley 將受公司力捧，成為 TVB 一姐。對此她表示：「當我攞咗獎後，其實都係 back to normal，我感謝公司及觀眾畀到呢個鼓勵我，等我喺影視路上有更大嘅使命感，我希望做好自己，唔好辜負大家對我嘅期望。」

她續說，視后的身分會成為自己追求進步的動力，亦提醒自己要用心演活角色，報答觀眾的支持。

撰文： Justin Wong

攝影： Harrison Ha

---------------------------------------------

>>>立即瀏覽【移民百答】欄目：新移民抵埗攻略，老華僑也未必知道的事，移民、工作、居住、食玩買、交通、報稅、銀行、福利、生育、教育。

>>>即讀【新移民專欄】：新移民第一身經驗，與你分享當下年輕移民生活日常大小事，即讀「新移民專欄」。