【康子專欄】攝氏36度以上，去邊？

先前說「攝氏33度」（5月24日），還有心情吹水：幻想去這去那。
　　
話口未完， 據說因受外圍颱風影響， 熱浪猛撲。像港島的跑馬地，氣溫高達攝氏36度（可憐的馬）！新界地區一定會更熱。
　　
點算？於是想起，聰明朋友的名句：「免費冷氣，Internet無限上網。」
　　
邊度咁筍？只有「返工」去。如果可以的話，盡早上班，趁太陽的熱毒，尚未照射到你的身上之時，返回公司，埋頭苦幹。
　　
仲有錢收。既可節省家中電費，又有糧出，完全是「雙贏」局面。
　　
更妙在可以隨時上網，公司無限量支援。一有冬瓜豆腐，即刻找「IT」同事，任你差遣，在家工作，哪有這種奢侈？
　　
可見「返工」必勝。除非你在戶外工作，否則，不論你躲在銀行/超巿/醫院/殮房/商場/學校/戲院/餐廳/圖書館/政府辦公大樓等等，總之有咁耐留咁耐，最好可以過夜，慳返不知多少家居電費。
　　
同樣情況，發生在英國，卻相反在冬季。去年短暫寒冷，燃料費高漲，記者街頭訪問：「怎樣保暖，才能度過寒冬？」
　　
路人甲乙丙凍到震音，答：「梗係要返公司！」不過，金句改為「免費『暖』氣」、「無限上網」則如一。
　　
須知在英國、歐洲及北美等地區，冬天冷起來，非同小可，性命攸關。無奈，暖氣費高昂，現代人不時興燒柴，室內又不可以燒炭，返工「歎暖氣」是王道。
　　
不過在香港，溫馨提示：公司的免費冷氣雖好，卻要做足「防寒措施」。像聰明朋友，辦公室長備皮褸/羽絨/冷帽。誇張？無奈，她是公司內，最後冷病的那一個。
　　
可見香港的情況特殊。
　　
猛暑時更特殊，有鬼神莫測之變，外來朋友請多注意。