【曾智华专栏】调查结果肯定唔准

警方公布首季骗案数字，录得8886宗（咁鬼好意头㗎），按年飙升六成半。骤眼睇落，哗，好似好劲㖞。不过，只要你向身边任何人问问，都知今时今日骗案早早“水银泻地”，点可能一季只得八千几宗呀？八万几都已经讲少咗！因为大量市民中招或冇中招，基于不同原因，连报案都费事。
　　
点解咁多人行骗？骗徒十之七八乃“经济学专家”，完全明白付出及风险与收入不成正比，甚为着数也。
　　
执法者老友拉过不少骗徒，部分非常坦白：“阿Sir，又唔使偷，又唔使抢，毋须用暴力，只需坐在冷气房，用Handsfree不停打电话已经掂，好似钓鱼啫，有耐性，肯定有水鱼上钓。N咁多骗案， N咁多人受骗，断正机会根本唔大，加上刑罚唔算重，非常博得过㗎！”
　　
某政党基于骗案火箭式上升，于是在网上及街头做访问，睇睇骗案最新走势。
　　
调查访问咗六百几人（ 喂， 少唔少啲呀？），结果发觉七成受访者每周收到三至五个疑似骗徒讯息（吓？每周三至五个？咁我与大群老友肯定属于不普通的人嘞，因我哋个个每日最少收到五至七个几乎肯定系行骗电话讯息！
　　
另外，政党调查又显示，一成香港人曾堕入不同的骗局陷阱。（哈哈哈，一成？倒转就会！香港人一生之中从未畀人呃过的，肯定不足一成！）
　　
小弟认为某政党调查结果得啖笑，完全唔准。事实，单单个人认识的朋友，由普通小市民打工仔到明星、大状、医生、CEO、富豪、高官、议员⋯⋯以至执法者（珍珠冇咁真）皆九成曾中招。
　　
不过，呃骗你，并不一定犯法㗎。例如朋友作个悲惨故事呃你借钱，然后扮失忆唔还啦。

---------------------------------------------

>>>立即浏览【移民百答】栏目：新移民抵埗攻略，老华侨也未必知道的事，移民、工作、居住、食玩买、交通、报税、银行、福利、生育、教育。

>>>即读【新移民专栏】：新移民第一身经验，与你分享当下年轻移民生活日常大小事，即读“新移民专栏”。