獨家丨全民造星V丨十強已誕生大熱門全入 觀眾集氣求Vincent復活無望
《全民造星V》已播了超過兩星期，只剩餘少量參賽者未出場，當中不少入圍者令人印象深刻，好似Win Win（楊安妮）男友99號KC（黃家灝）及紐約百老匯劇院表演者Lyman Heung (香胤宅)，前者更已經有粉絲專頁。撰文:星島頭條娛樂組
咪以為只有入圍者先多人關注，來自馬來西亞的富二代、被封為「馬拉193」的59號Louis（陳則銘），hea爆演繹《情非得已》，又對伍詠薇單眼及狂派心，被對方狠批，「你咁樣對我冇用㗎！」3個評判完全唔buy其懶風趣演出，全紅燈直接淘汰。不過似乎觀眾緣唔差，有網民留言表示：「難得佢表現咁hea又唔在乎，竟然唔太乞人憎！」認為其懶懶閒風格加上幾分似韓星李敏鎬，點都值有一盞安慰藍燈。
仲有來自加拿大的34號Vincent（羅穎生），表演自彈自唱《眼睛不能沒眼淚》，雖然表現唔突出，但唱得平穩加上個樣走bb可愛風，感覺唔太差，不過評判Edward Chan就唔多鍾意，直言好呆，「似由細到大俾屋企人迫學彈琴咁」，連平時好手鬆的「一燈大師」都突然手緊，更認為他只得20歲仲有大把機會，最後同樣全紅燈淘汰。
然後討論區及ViuTV Page一片哀號，「還我Vincent」之聲不絕，網民均認為Vincent正正只得20歲經驗不足，所以表演太平鋪直敍，唔夠花巧，但勝在零晨5點演唱未有大錯失，唔可以即時入圍都應該有一盞藍燈。更有網民集氣，希望今屆可以如首屆一樣，被淘汰後有翻生機會。不過，各位網民真係唔好意思，節目組唔會聽到你哋嘅聲音，所以亦唔會有翻生機會，因為節目早在一月尾已開拍，玩咗4個月，真實情況已經去到十強已誕生，據本報收到風，十強中唔多海外參加者，仲要本地大熱全入，香港參賽者世一。
《星島頭條》新網站有更多精彩內容：http://www.stheadline.com/
>>>星島網WhatsApp爆料熱線(416)6775679，爆料一經錄用，薄酬致意。
>>>立即瀏覽【生活百答】欄目：新移民抵埗攻略，老華僑也未必知道的事，移民、工作、居住、食玩買、交通、報稅、銀行、福利、生育、教育。
