【曾智華專欄】我會買Vs.我不會買

幾時入市買股，我不會考慮群眾情緒或甚麼經濟大勢（人人靠估），反之，只鎖定三兩隻長期投資的重點股，有耐性地等！如昨天透露的港交所，我會分兩部分處理。一部分買咗唔理，長線放退休組合，雷劈都唔出貨。另一部分玩波幅，每當300元以下，就逐跌10元加碼入貨，直至彈盡糧絕，然後等佢升到320元就開始放，也是每升10元放多一點。這種玩法，大家可以睇睇此股過去三年的上落線有幾多次，就大致可知小弟約有多少利潤。今次港交所再跌破300元，我已等足大半年了！

港交所乃「皇帝御賜」股，唔准競爭，獨家經營，國家錫晒，真係客觀條件筍到「完全唔合理」㗎！

所以，我點會唔買？一到價就買買買！另一隻必買的為長實集團，點解？因為李嘉誠父子近日頻頻回購囉！由42.8元到46.4元都有。小弟多年觀察，超人賣的（連佢都放棄！）投資產品，你要小心（中環中心乃典型傑作）！倒轉，超人吸納的，一於跟啦，多數冇死！

昨日又有老友問：「周杰倫隻概念股傳本周上市，你會否認購多少呢？」

「一個仙都唔買！從來對新股冇興趣。唔該上市後表演返三五年畀我睇，睇你個管理層有乜功力先！尤其是涉及『概念』兩字，即非常之『虛』，更加咪搞。更何況最攞命為此股純賣周杰倫一個人，成家公司並非強調制度、結構、策略，而是講個人。咁⋯⋯若佢上市後『因個人決定』而有變卦，點搞？」再睇睇此股，純利由2020年回落，原因正是「《周遊記1》的重大宣傳效應停止」。周杰倫粉絲為撐偶像場，一定多少買啲，但就咪搞小弟嘞。