【曾智華專欄】騎師最怕貨比貨

終於有個似樣的外援騎師嘞，馬迷一定知我講邊個，正是紐西蘭騎師戴文高。
　　
不怕不識貨，最怕貨比貨。騎師一落跑道，表演幾場，大家已知其鬥志、天分、騎功、膽識⋯⋯
　　
快活谷跑道相當蝦人，新來的，必定要一段時間才能適應其上山落山及急速掟彎，少啲平衡力都分分鐘會大波勾也。
　　
小弟極少賽後翻睇巡邏影片，因輸咗就輸咗，喊都無謂也。
　　
但周三破例，因要重溫戴文高如何策騎「天外驚天」，於直路如飛殺上，擒下看來必勝的「佳尊三」，眼前一亮也。
　　
之後再睇佢騎「中華英雄」，一步都冇放棄，博入第四。仲有，將排十檔、看似冇乜機會的「勇眼光」力剷入Q，唔⋯⋯以第一次出賽快活谷的新仔而言，騎三場而交出如此表現，希斯果真獨具慧眼！
　　
點解咁高手騎師，其他練馬師一隻馬都冇提供畀佢呢？呢種唔識貨現象，相信好快一百八十度倒轉，因馬圈乃跟紅頂白的舞台也。
　　
翻睇戴文高騎三場全部搏命時，我又再睇埋香港騎師之王潘頓點處理同晚馬匹。乜佢係「潘頓」咩？唔多似喎，有幾場入彎波勾，最後二百又施展「柔功門」。
　　
不過，今時今日以佢老哥地位，仲有邊個監場及賽事董事會嚴厲地用Close Up，慢鏡睇佢全程有冇決心吖，唔驚驚佢又扭計話拜拜咩。
　　
講到過江龍，前雪梨冠軍騎師艾道拿，至今仍只是一「過江蟲」，跑咗三十一場，Q都冇條，名不副實，幾時先可以Show Quali呀？
　　
明天小弟一於買「當頭起」！全部戴文高坐騎買WP，投注140元，然後揸杯冰凍大生啤送陳皮花生，睇佢點樣表演！七隻中我最愛「快狠準」，希望衝線時馬如其名！