獨家丨胡子彤「心儀」ANSONBEAN想演情侶 蔡思韵拍《失衡》被朱鑑然虐打

蔡思韵（Ceci）、胡子彤、朱鑑然（朱仔）及ANSONBEAN（陳毅燊）在驚慄電影《失衡凶間之罪與殺》單元《貓劫》中首度合作，戲中眾人互相傷害，但現實相當老友。講到訪問當日的VIP非ANSONBEAN莫屬，個個圍住佢轉，子彤仲點名要同呢粒可愛豆演情侶。採訪：杜杜 攝影：羅安強 造型:Daniel Cheung(BEAN) 髮型:Nick Lam@Orient4(Ceci)、Sam lo@orient4(子彤、朱仔)、Derek Li@Xenter　Salon(BEAN) 化妝:WiLL Wong(Ceci、子彤、朱仔)、Jenny Shih(BEAN) 服裝:Gucci(Ceci)、Sandro Paris(子彤)、Sefr from Mr Porter(朱仔) 、Angel Chen studio by Lane Crawford(BEAN) 場地: WESTART

Ceci、ANSONBEAN、朱仔和子彤第一次合作，可惜相處時間太短。

子彤和朱仔雖然認識多年，但第一次有較多對手戲，仲有機會打對方。

Ceci和BEAN戲中一齊做貓義工，有不少對手戲。

Ceci、子彤、朱仔都覺得初次拍戲的BEAN好鬼cute，例如講到戲中Ceci和BEAN有「全黑貓眼人」造型，BEAN認為唔算特別，因為自己平時都係咁。「我都會着到成身黑色，行山路會危險，我都會咁着。」全場嚇一嚇再一齊大笑，一班哥哥姐姐忍唔住出手，Ceci耐心向BEAN觸釋，「應該係着彩色衫，驚有咩事人哋睇到你嘛！係咪學到嘢？好嘢！」子彤亦補充，「着彩色啲，就好似反光衣嘅原理要俾人見到。」BEAN聽完明白晒，「又好似係喎！」子彤忍唔住讚，「佢真係好cute呀！」

4人訪問似朋友傾偈，完全講唔停好鬼high。

Ceci和BEAN有「全黑貓眼人」造型，有點超級英雄feel。

子彤打女人好難落手

戲中Ceci要被子彤和朱仔虐待，子彤就笑言：「真虐待，完全冇留手。」唔怕Ceci男友劉俊謙報仇？朱仔得戚表示：「劉俊謙係專業嘅演員又點會報仇呢？係會嫌演得唔夠。」不過子彤承認對女拍檔郁手確實困難，「打人嗰個永遠驚過俾人打。」Ceci就強調製作單位好專業，「有好多安全措施，同有專人指導，我被打都覺得好安心。」

Ceci和朱仔戲中會互相傷害，後者唔擔心劉俊謙為女友報仇。

子彤會有虐待Ceci的場口，他笑言完全冇留手。

由於今次只是單元故事，4人都覺得合作未夠喉，子彤對跟可愛的BEAN交流機會不多大歎可惜，「想同BEAN可以多啲同場，演乜戲都得。（情侶得唔得？）都得，佢咁cute唔係唔溝佢嘛！」對被子彤「厚愛」BEAN笑得有啲尷尬，他即解釋，「我冇呀！」叫BEAN即場揀另一半，他答得爽快，「子彤囉！」被禮尚往來的子彤即尖叫勁開心，場面搞笑！

動作戲事前有好多排練，所以Ceci被打都好安心。

初次演戲的BEAN，開拍前雖有上雞精班學戲，但埋位即緊張到完全忘記。

《星島頭條》新網站有更多精彩內容：http://www.stheadline.com/