【曾智華專欄】向米歇爾奧巴馬致敬

美國近兩個總統，質素低處未算低，冇晒昔日甘迺迪、列根、克林頓，甚至奧巴馬的風采。

一個特朗普已令人搖頭倒胃，再來一個行動遲緩、冇貓紙講唔到嘢的拜登。大家不禁問，美國政壇發生乜事？被咒中？

其實美國政壇高質素、有魅力者不少，總統之外，總統夫人也能令人眼前一亮。

個人最喜歡的，為米歇爾奧巴馬，優雅得體有教養，文化水平及品味皆高，點解冇佢咁的卡士人物做總統呢？米歇爾從第一夫人崗位步下後，並沒停止做具使命感的工作。兩夫婦成立咗一家高地製片公司，主攻拍有積極意義的電影，並與Netflix簽下多年期協議。

頭炮一鳴驚人，片名《美國工廠》（《American Factory》），於2020年奪得《奧斯卡最佳紀錄片獎》及《艾美紀錄片及傑出導演獎》。我有幸上周在Netflix欣賞到，冇得唔服，獲得大獎實至名歸，完完全全貫徹米歇爾的信念：「我相信講故事的力量，可以激勵世人，讓大家以不同方式思考世界，然後互相敞開心扉！」

「美國工廠」背景是一個美國悲劇。2008年金融海嘯席捲美國，經濟重創，大量企業倒閉。連歷史最悠久的通用汽車都要執笠，令數千工人失業，千計家庭頓失所依。

相對地，中國則經濟騰飛，國家政策鼓勵企業家「走出去」。2015年中國汽車玻璃大王曹德旺決定作領頭羊，花上十億計美元投資，並安排大批熟練中國工人去到俄州，抱著一個期望——令美國人對中國及中國人有新的看法。

導演處理手法高明，沒有激烈政治立場及歧見，只扎實有力地描繪兩種文化及工人的矛盾及融合，值得細意欣賞。推薦！