獨家追蹤丨直擊64歲宮雪花狂掃減價貨拒入更衣室就地試衫 被屈打尖發火鬧Sales

宮雪花（花姨）出名騎呢，曾自爆28年前參選亞姐為搶風頭專登報大10歲，實際年齡「只得」64歲。騎呢事跡還有同屆亞姐亞軍黎淑賢（Bonnie），早前受訪曾大爆花姨有舖當眾換衫癮，Bonnie冇吹水，《頭條日報》有幸直擊花姨在時裝店狂掃特價衫時，果然有試身室唔入，全程旁若無人當眾試衫。而本來掃貨掃得好開心的花姨，排隊找數時被Sales誤會打尖，仲發晒脾氣大聲鬧人兼掉衣架，火藥味勁濃。採訪：頭條娛樂組

花姨當年報稱47歲以破紀錄高齡參賽，成為一時佳話。

花姨早於1995年參選亞姐時已相當出位，由於賽制不設年齡上限，當時她報稱47歲以破紀錄高齡參賽，成為一時佳話，更成功奪得第五名，兼獲「最受傳媒關注獎」。不過相隔28年，花姨對台灣傳媒承認當年講大話，更即場展示身份證，確認今年只是64歲（1958年5月19日出生）而並非74歲。

花姨同黎淑賢是同屆亞姐出身，分別奪得最五名兼「最受傳媒關注獎」及亞軍。

專攻繽紛妹仔衫

今年初，黎淑賢接受電台訪問，大談當年選亞姐的絕密舊史，包括選美黑幕，還大爆花姨在巴黎拍外景時的驚人爆笑舉動，「當時買完嘢上返旅遊巴，佢竟然喺車上換新衫！」她又指因花姨行為出位，令站在她身旁的佳麗都黯然失色。

黎淑賢同楊玉梅受訪，大爆花姨參選秘聞。

習慣嘅嘢好難改，而花姨呢個當眾換衫的舉動，28年來完全冇變。日前晚上8時多，本報記者在九龍灣德福商場發現花姨單拖逛時裝店，由於花姨身穿白色通花外套及喱士長裙，內襯桃紅色背心加踢對拖鞋，仲要戴住黑色閃石Headband，由於造型完全九唔搭八的關係，一眼就認到係花姨。見她主攻減價貨品，專揀$129至$259，好Colourful、好妹仔款的貼身衫及短裙，或者價錢太吸引，花姨揀咗一大堆衫待試，以為佢會排隊等更衣室試衫，估唔到佢索性就地試身。她先除下通花外套試上身衫，見佢將一件粉紅上衣套落桃紅上衣，照完鏡再除出嚟，之後再將中碼的綠色短裙仔套喺原本條喱士長裙，不禁要讚吓花姨又除又剝都全程冇走光，但當眾試衫的行為相當唔正常，同場顧客經過都畀佢嚇一嚇，不斷回頭望佢。

一身白色通花加喱士加桃紅的花姨，見到減價衫即興奮狂揀。

睇得出花姨訓練有素，又着又除都完全冇走光。

花姨試著中碼短裙，本身已有條長裙加上Size唔啱，拉唔埋拉鍊都好正常。

花姨雖然64歲，但人老心唔老，睇中嘅裙仔幾Cute。

花姨邊試邊不停叫Sales攞大碼畀佢。

愛性感打扮嘅花姨，對小背心愛不釋手。

Sales誤會想打尖

花姨掃貨掃得興起，不斷邊試邊叫Sales攞大碼畀佢，最終試足成個鐘揀咗10件衫。最後睇埋耳環，冇嘢啱的花姨就去排隊畀錢，可能因為佢排隊時唔肯企定定，掛住攞旁邊啲貨品嚟睇，結果令Sales誤會佢想打尖，開聲話佢打尖會對其他顧客唔公平，被屈的花姨即時扯火先掉衣架，再發脾氣大鬧Sales：「想公道嘅去搵法官啦！」不過雖然花姨被誤會好嬲，但為咗一堆好抵嘅衫將骨氣放埋一邊，照畀錢，最後10件衫裙盛惠1300蚊，瘋狂Shopping完再坐港鐵離開。

睇完一輪衫，花姨再睇首飾，逐件耳環埋鏡拼拼。

花姨被Sales誤會想打尖，即扯火將衣架連衫掉上櫃枱，更大鬧sales，「想公道嘅去搵法官啦！」

花姨被Sales誤會想打尖，即扯火將衣架連衫掉上櫃枱，更大鬧sales，「想公道嘅去搵法官啦！」

最後揀咗10件衫裙，埋單超抵只需1300蚊。

《星島頭條》新網站有更多精彩內容：http://www.stheadline.com/