【曾智華專欄】大倉肯收的低班馬

資深馬迷每次賽後必定會做功課，從經驗中吸取智慧（或教訓），如此未來日子才可以趨吉避凶，輸少一點，或贏返多少。

其中少少智慧，早前《賽馬日在線》節目中，主持也有指出，正是「大倉肯收低班馬」，若這現象發生，必須留神，肯定事出有因。

眾所周知，香港幾個大馬房，包括蔡、姚、羅、沈、方及告，全部爆倉，有六十幾匹馬。每個馬格都是「寶」，只留來畀有潛質的新馬，又或替廄主掘金的高班馬。所以，佢哋會不停游說馬主將稍差的馬退役，又或「唔該借歪搵第二個」，此乃正常現象。

所以，若上述幾個馬房突然肯收一匹五班馬，背後原因必定不尋常。其中有兩個可能：一、肯收一隻「垃圾馬」，馬主會拉多幾隻高班加盟；二、隻馬仍有得贏，只不過上手練馬師水蛋。

舉例，兩個月前羅富全竟肯收隻三十三分，九場九負，未W過的五班馬「陽光傳奇」。

點解？一轉飯鑊上陣即有解釋！完全唔使大師傅，安排本地薑梁家俊策騎，一入直路已知贏硬，近七倍殺W。

上手練馬師高伯新真係「情何以堪」！此馬只得四歲，若羅富全唔掃佢走，即仍有W在手！

另一個黎昭昇也犀利，玩一隻來自葉廄，未W過的「陸知」，竟可跑八場，摘下三W兩Q一P。小弟必須承認，季初睇錯咗佢，原來是非常有料的高手，睇佢馬房寶藏之多，下季必將大放異彩！

「陸知」還有幾多上升空間唔知，只知上手練馬師一Q都撚唔出，真係……唉！今晚食泥，興趣不大，照玩！

10蚊注WP買兩隻五班馬，純觀察。一、「順利取勝」，蔡神仙冇掃佢走，應有揸拿！二、「小玩家」，看看黎昭昇能否再變魔術！