【曾智華專欄】送藥到家是德政

普羅大眾及傳媒絕少讚政府，因人人諗，公職人員月月出糧，做得好係應該嘅。故此，十個市民有九個只獨沽一味彈政府，事實又有不少共鳴。

我又點睇？自己做過公務員，最理解。大家都係人，人就有情緒。正常人性反應，你鬧佢而想佢做得好，成效未必冇，但肯定不是最佳方法。相反，佢有表現時，你公開讚吓佢，咁呢種鼓勵真真動力無窮，必會加倍努力，愈做愈好！最近醫管局有項公共政策，的確值得讚——送藥到你家！

香港公院求醫者以百萬計，服務如此龐大數量病人，當然首先要講制度。其次，就要研究資源調配，如何達致最高效率。

小弟乃公院「熟客」，年年出入幾次，包括不同醫院，故此，可以監察不同醫院的政策，有冇與時並進，減低顧客（病人）的麻煩。

例如抽血，我每年到QE做兩次。早年個個鬥早去排大隊，最辛苦班老弱傷殘，係咁罰企，幸而近年慢慢改進。你去到，撳掣攞張電子號碼券，跟住坐去邊都得，輪到你才埋去登記，索取抽血用的膠管。

其實到公院，人人都預咗等等等，但某啲「等」，完全不必要。例如等攞藥，有的病人只取一種，有的則取十幾種。將一種者混入十幾種者一齊等，根本浪費前者光陰。

呢方面，沙田威院管理層最早改善。易，分流。一種藥的一條隊，兩至四的一條，多種藥的又另一條，非常便民。

反之，小弟到QE取藥，次次等個半小時，實在浪費光陰，難道先回家再來咁戇居？好了，遲到好過冇到。醫管局終於推出送藥到家新政策，每次收費六十五元。病人可將慳回的時間做更有意義的事。德政，抵讚！