【曾智華專欄】讓獎？

上周本地樂壇出咗段新聞，話有「知情人士」透露，張敬軒決定婉拒出席今屆港台《十大中文金曲》頒獎禮，如是，等於放棄角逐「最優秀流行男歌手」大獎。「知情人士」又話，軒仔決定成人之美，將更多攞獎及曝光機會留給後輩。
　　
以上說話，幸好不是直接出自張敬軒口，否則1988年的「譚詠麟不再攞獎」風波，將可能在今天重演。
　　
今天看本欄的讀者，究竟有幾多在三十五年前已超過十歲、有記性、有意識的呢？
　　
等我帶大家重溫一下當年這件「大震撼事件」。
　　
1988年初，香港電台舉辦《第十屆十大中文金曲頒獎音樂會》，當年此乃一年一度，不但樂壇，更是全城矚目盛事。頒獎嘉賓囊括當時的商界、政界及名氣界一時瑜亮，乃港聞及娛樂版的焦點新聞。
　　
當年樂壇，阿倫絕對橫掃，由1983年、1984年開始，若果真的「一人一票」選金曲，咁十首隨時畀佢掃咗八首，其他個個等食白果！
　　
不過，1986年開始，張國榮橫空殺出，勁度驚人，尤其《無心睡眠》一曲，更掃盡所有流行榜。肯定在Leslie心中，只有一個目標——過阿倫頭，成為真真正正香港No. 1！
　　
豈料當佢如飛殺上，逢馬過馬，睇勢，1989年必定勝出之際，譚詠麟竟使出獨門絕招，在1988年《十大中文金曲》頒獎禮台上，突然宣布以後唔攞獎，即係——我唔同你張國榮跑喇。
　　
美其名「畀多啲機會後輩」，實質就是令Leslie以後都冇機會在金曲頒獎禮上，將佢技術性擊倒！
　　
你係張國榮，會點反應？
　　
當日我正是音樂會的後台經理，與所有人一樣，在毫無預先通知下，聽見阿倫咁講，反應怎不呆咗，頻問：「喂喂，阿倫，你有冇搞錯？咁樣做，想人唔話你……」