獨家丨82歲鄭國江開心填詞作品幫到人 隱蔽青年聽陳百強歌曲有返目標

著名填詞人鄭國江繼2016年舉行入行45周年演唱會後，本月底將舉行4場作品展《鄭國江50+2詞名一生演唱會》，慶祝入行52年，而演唱會因疫情而改期多年，幸好一班歌手老友都肯辛苦度期支持，令鄭老師很感動。多年來填詞作品超過2000首的他，最感動能夠藉着歌曲幫到人。採訪：杜杜

鄭老師入行52年，最開心作品對人有正面影響。

鄭老師在2016年已舉行過4場《鄭國江45周年名曲 巨星演唱會2016》，原本2021年舉行的作品展是慶祝50周年，可惜因為疫情而改期，「因為伊館變成疫苗中心，所以都搞唔到，結果推到今年，演唱會由『50』變做『50+2』，其實都冇所謂，當初都係擔心自己今年都82歲，身體撐唔撐得到，幸好呢兩年都仲OK，係耳仔差啲。」

2016年《鄭國江45周年名曲 巨星演唱會2016》，鄭老師邀得汪明荃、區瑞強和泰迪羅賓演出。

感激歌手辛苦度期

演唱會不斷改期，鄭老師最感動林子祥、譚詠麟和陳潔靈等超過15位歌手，依然一呼百應答應演出，「其實通咗關之後，佢哋個個都好忙，大家都有好多演出機會，度期仲難啲，但係佢哋個個都好好，我一開聲佢哋都話會盡量度，就算去咗其他地方工作，都專登返嚟一日幫手，真係好感激佢哋。」

鄭老師感激林子祥在百忙中都幫手演出。

夏韶聲1979年成名作《童年時》，出自鄭老師手筆。

近年已鮮有公開演唱的張德蘭，為了鄭老師也粉墨登場。

曾是小學老師的鄭老師，參與填詞工作超過半世紀，作品超過2000首歌，他坦承很難選擇當中最愛，但作品能夠影響到人絕對是最大收獲，「試過幾年前跟太太去尖沙咀飲茶，遇到個年輕人，佢原來係我學生嚟，佢話好多謝我幫咗佢，我當時以為我教過佢，佢呢啲係客套說話，後尾佢話原來佢曾經係隱蔽青年，過咗一段好黑暗嘅日子，直到有日佢聽收音機聽到我為陳百強寫嘅《飛出去》，畀歌詞啟發咗，之後肯積極做人去搵工作，仲同父母關係變好。」不過最搞笑是鄭老師最初都忘記自己有這首作品，「佢同我講時都唔記得咗有呢首歌，後尾查返先知係陳百強好早期嘅作品，但聽到自己嘅歌可以幫到人，真係覺得好有意思好值得。」

鄭老師多年來奪獎無數，2016年更舉行過詞作展「藝園漫步」展出。

《鄭國江50+2詞名一生演唱會》將於本月底在伊館舉行。

《星島頭條》新網站有更多精彩內容：http://www.stheadline.com/