【曾智華專欄】如果沒有鄭國江⋯⋯

上周日沙田馬場富衛國際賽日，香港馬威風八面，將三項一級賽冠軍全掃下。
　　
當日每場賽果產生後，官方傳媒會立即捉住冠軍騎師訪問，此時就可見到每一位的不同修養。
　　
香港馬王「金鎗六十」騎師何澤堯，回答最為得體，將一切榮耀盡歸馬王，非常誠懇回應：「Without him, I'm nothing！」
　　
此答案一出，我腦海即時彈出一位又一位在世或已故的樂壇巨星，包括張國榮、鄧麗君、羅文、梅艷芳、陳百強、譚詠麟、林子祥、鄭少秋、翁倩玉、呂方、徐小鳳、關正傑、林志美、蔡楓華、泰迪羅賓、曾路得、葉麗儀、葉振棠、露雲娜、甄妮、鍾鎮濤、盧業瑂、陳美玲、區瑞強、麥潔文、李龍基⋯⋯
　　
上述巨星級人馬，大家可曾聽到佢哋公開講過：「若果沒有鄭國江（或顧嘉煇，或黃霑，或林振強，或盧國沾⋯⋯），I'm nothing！」
　　
歌星，只負責演繹一首好歌。但任何經典之作，真真正正的靈魂，乃先是作曲者，然後是填詞者。沒有上述兩靈魂，歌星唱到會飛都冇用！
　　
事實小弟親眼見過，巨星死求爛求兩種靈魂及唱片公司決策人：「請畀呢首好歌我啦！」
　　
點解咁講？因為個個歌星皆知，沒有好歌，佢哋就係Nothing！
　　
不過，似乎大部分巨星唱完之後，就忘記晒自己點解咁紅。
　　
又唔係全部如此的。例如區瑞強，早年公開向Uncle Ray感恩。如今呢，則憑一人之力，五月底租下四晚伊利沙伯體育館，向鄭國江老師致敬，製作《50+2周年詞名一生演唱會》。
　　
前日收到佢電話，一貫溫溫文文問：「碌Sir，請你拔刀相助！」
　　
一睇卡士，掂硬，速速「拔刀」，大家快啲上網搶飛啦！看看到時班巨星會否講「冇鄭國江⋯⋯」呢？