【曾智華專欄】誰大誰惡誰正確？

早上撞入地踎茶記，大群的士粗豪（口？）佬又在聲大大開《城市論壇》，肥佬B口水噴窒：「頂頭槌，真係誰大誰惡誰正確！」
　　
起初我以為佢又在描述某某位高權重大官，又或啲乜乜「江湖惡人」，原來唔係，係講緊冠軍騎師潘頓。
　　
潘頓早前揚言「唔玩喇」，表示會返澳洲。當時小弟一聽，已聞到陣陣「吊高嚟賣」味道，擺明想講數！
　　
今時今日潘頓在香港，以「隻手遮天」形容不為過，真係贏輸隨意，馬場之內打橫行，因佢一人孭起大量投注額。事實馬會已經冇咗莫雷拉（理由神神秘秘，冇人敢爆），若再冇埋潘頓，「以投注額為本」的馬會高層肯定踢晒腳。事實佢哋若想收千萬元到幾千萬元年薪，必須睇住個投注額做人。所以，唯有「秘密」與潘頓講數，公布出來的，起碼是給予更大自由度。
　　
「鳳凰潘」享有的條件，其他騎師有冇呢？騎騎騎，發吓夢就有！
　　
其實肥佬B指出的——誰大誰惡誰正確，根本個個圈皆如此，乃「阿媽係女人」現象。
　　
不過咁，只隨口呻或揶揄的，冇一個懂得拆解為何如此的深層真象——為乜佢哋可以升到「又大又惡又正確」位置？天跌落嚟？樹生出嚟？難道潘頓在做見習生時有此牙力？儍嘅先以為一切是偶然發生的。
　　
馬會「怕咗」潘頓，因佢的確超級犀利，至今累積頭馬邁向一千六百場，乜嘢大賽都贏過。未到港前，在2002年已是澳洲布里斯本冠軍騎師。多年來，不斷提升自己騎功，終於成為「香港一哥」，所付出血與汗，再加過人天分，一千個騎師也難有一個如此！
　　
好，講吓明天「皇太后紀念盃」，三級賽大長途，讓磅。我選「直線力山」及「錶之五知」，皆進步中！