【曾智華專欄】「扶手拉」有待復活

莫雷拉大賽日重現沙田，騎六隻，交出一W一P，若隻隻十蚊買WP，有二十幾蚊利潤。睇佢個款，令馬匹舒服地跑的高超技巧仍在，但鬥心及專注則頗為欠缺，用佢做扶手棍，未係時候，相比當日潘頓、麥道朗、布文、蘇兆輝及馬昆鬥最後一百米的狠勁，差出一大截。希望拉叔下次再臨香港，可變「扶手拉」啦。

大賽過後，會否一節淡三墟？

其他行業可能會，但香港賽馬業絕對不會！因馬迷最目光短暫，只集中在下個賽日。今晚又跑快活谷！

先睇練馬師榜。小弟早在此發表「蔡氏宗親會徒弟護師傅到終點論」，意即今年蔡約翰攞硬冠軍，因任何馬房想追近，皆要先過羅富全一關，然後才有機會埋佢身。早前坊間猛唱姚本輝有機會，我實牙實齒話得啖笑，馬會都想「蔡神仙」玩耐啲也。

今季練馬師新丁黎昭昇出閘大脫腳，不過，跑跑吓已頻頻Show Quali，至今贏咗二十八場，位處中游。肯定當旗下新子彈一批批抵港，又再成熟時，即可問鼎級制賽矣。

冠軍騎師潘頓最醒目，明知小黎一手都係寶，故此早早泊定碼頭。有目共睹，「鳳凰潘」凡騎黎廄馬，寧舍落力，絕少夢遊馬場，相比騎其他馬房仔賽駒完全不同。尤其快活谷賽事，潘頓更經常儼然黎廄主帥，今晚又騎四匹喇，當中「勝神威」及「喜快」必熱，因質素新兼有根有據。

「勝神威」今季四戰跑馬地，犀利，兩W一Q一P，全入前門。如今四歲，仍在上升期，今仗排二檔，簡直執錢！

另一隻轉倉馬「喜快」，今季出兩次，分別第三及第四，已試準。今次排三檔，潘頓執韁必熱到辣手，應該係時候起筷，不能不買！