【曾智華專欄】拘捕、公布、判刑

任何奉公守法的駕駛者，必定極之討厭「馬路暴徒」，包括：胡亂切線、切線唔打燈、不停狂砵、跟車太貼⋯⋯
　　
部分可能未到犯法邊緣，但也是非常之沒操守，可以隨時造成意外的鹵莽司機。
　　
近年有咗車Cam後，好咗嘞，因一切唔使口同鼻拗，大部分情況之下，有晒影像記錄。
　　
相信不少正常司機皆似我一樣，希望警方密啲手告，等班無良司機付出應有代價。
　　
上周極度「人神共憤」的一單，為一架消防車在西隧急趕救人，需要切線，點知有架深色Tesla死都頂住。當時消防車已閃晒燈，也打晒指揮燈，示意趕急，但Tesla司機就是拒讓，一派「話知你死」的惡劣態度。
　　
全部過程被後面的車影清影楚，立即掟上社交平台。咁鬼離譜，當然火速轟傳，個個睇到都必定MM聲。
　　
當晚小弟剛剛遇上一位大狀，立即請教，有冇法例可告呢名既自私又欠缺公德司機？
　　
「有！道路交通管理規例聲明，必須讓路給動物、警車、救護車等。當然不是任何情況，而是要在保人與動物的安全情況底下。另外，法例規定，必須讓路給任何正在響鐘、發出警報聲響、鳴鑼或發出閃光警示的警車、消防車、救護車或海關車輛。違者即屬犯法，可處罰二千元！」
　　
「吓？二千元？冇乜阻嚇作用咋噃！」旁邊老友話。
　　
小弟又點睇？人要面，樹要皮，二千元雖少，但執法者可高調拘捕，令對方變被告。然後公布名字及身分，讓全港傳媒知道邊個冇品司機被告。
　　
如此傳媒必大肆報道，輿論亦唔會放過佢，然後再判刑。
　　
傳媒監察力，正正需要在這種情況下行使。當然法例也要修改，起碼罰二萬元！